टिपर ब्याक गरेर मोटरसाइकल चालकलाई मार्यो

भक्तपुर । सूर्यविनायक बालकोटमा टिपरले ठक्कर दिंदा एकजनाको ज्यान गएको छ । हिजो बुधबार राति एक टिपरले मोटरसाईकललाई ठक्कर दिएर लडेपछि ब्याक गरेर किचेर मारेको थियो ।

ना४ ख ८१८२ नम्बरको टिपरले बा९९प ८२८२ नम्बरको मोटरसाईकललाई ठक्कर दिँदा मोटरसाइकलमा सवार २४ वर्षीय मनोज मगरको घट्नास्थलमै मृत्यु भएको महानगरीय प्रहरीबृत्त थिमीले जानकारी दिएको छ ।

तीब्रगतिमा आएको टिपरले बालकोट हुँदै घरजाँदै गरेका ललितपुर चाँगाथली विष्णुटोल बस्दै आएका मगरलाई बालकोटमा ठक्कर दिएको थियो ।

टिपर हुर्इँकिएर आएपछि बालकोटतर्फ जाँदै गरेको मोटरसाइकलाई ठक्कर दिएको थियो । मोटरसाइकल लडेको देखेपछि स्थानीयले हल्ला गरेका थिए । प्रत्यक्षदर्शीले ए ए भन्दाभन्दै टिपरले ब्याक गरेर किचेर मारेको स्थानीयले बताएका छन् ।

प्रहरीले टिपर र टिपर चालकलाई भगाएको प्रतक्ष्यदर्शीले आरोप लगाएका छन् । प्रहरीले टिपर चालकलाई पक्राऊ गरेपछि भगाएको आरोप लगाएका छन् । स्थानीयले टिपर तोडफोड गर्न लागेपछि प्रहरीले लाठीचार्ज गर्दा बालकोट केहीबेर तनाबग्रस्त बनेको थियो ।