धुर्मुस–सुन्तली किन परे आखिरमा अलमल ? यस्तो रहेछ कारण

काठमाडौं, १५ चैत । नेपाल र नेपालीका लागि उदाहरणीय र नमूनायोग्य काम गरेर चर्चा र प्रशंसा कमाएको जोडी धुर्मुस–सुन्तली यतिबेला अलमलमा परेका छन् । मुसहर बस्ती, गिरानचौर एकीकृत वस्ती, सन्तपुर एकीकृत वस्ती बसाएर टेलिभिजन स्क्रिनमा मात्र होइन वास्तविक जीवनमै दुःखी पीडित जनताको मुहारमा हाँसो र खुशी ल्याउने यो जोडी किन र के कुरामा अलमल परेको होला ?

यो जोडी सानोतिनो कुराले अलमलमा परेको हैन । ठूलो र गौरवको विषयमा अलमलमा परेको छ । वास्तवमा यो जोडीको अगाडि दुईवटा महत्वाकाङ्क्षी योजनामध्ये कुनलाई पहिले गर्ने भन्ने विषयमा अलमल आएको हो । चर्चित हाँस्यकलाकार सीताराम कट्टेल “धुर्मुस”ले आफ्नो अलमलपनलाई फेसबुक स्टाटसमै राखेर सुझाव मागेका छन् । उनले यसअघि नै घोषणा गरेको “नमूना नेपाल” र “अन्तर्राष्ट्रिय क्रिकेट स्टेडियम”मध्ये कुन काम पहिले गर्दा उपयुक्त होला भनी आम जनतामा सुझाव मागेका हुन् ।

“अब विश्वले चिन्नेछ नेपाल, नेपालभित्रको नेपाल ‘नमुना नेपाल” निर्माण परियोजनाको सर्भेको काम सकेर मास्टर प्लान, डीपीआर र ईआईएको प्रक्रियामा अघि बढिरहेको बेला चौतर्फी रुपमा विभिन्न क्षेत्रबाट नेपालमा एउटा अन्तर्राष्ट्रियस्तरको क्रिकेट मैदान अपरिहार्य रहेको र सो निर्माणको संयोजन पनि तपाईहरुले गरिदिनुपर्यो भनेर एकप्रकारको सुझाव अनि अनुरोध आइरहेकै थियो । हामीलाई दुबै परियोजनालाई अघि बढाउन सकिन्छ कि सकिँदैन भन्ने ठूलो चिन्ता थियो । सबैको इच्छा, चाहना मात्र नभई क्रिकेटको स्तरोन्नति अनि खेलाडीहरुको मनोबल बढाउन पनि हामी दुबै चीजलाई अगाडि बढाउने निर्णयमा पुगेका छौं”, सीताराम कट्टेल “धुर्मुस”ले भनेका छन् । नेपालको क्रिकेटले अन्तर्राष्ट्रिय जगतमा देशको शिर ठाडो बनाएर हरेक नेपालीलाई खुशी दिलाउने मात्र नभई देशकै गरिमा उच्च राख्ने काम गरेको छ भन्दै यो अभियान धुर्मुस सुन्तली फाउण्डेशनको मात्रै नभई राष्ट्रकै अभियान भएको उनले बताएका छन् ।

फाउण्डेशनले निर्माण संयोजन मात्र गर्ने र यसका लागि छुट्टै इन्टरनेशनल क्रिकेट स्टेडियम निर्माण समिति बन्ने उनले बताएका छन् । “त्यही समितिको रोहबरमा इन्टरनेशनल क्रिकेट स्टेडियम बन्नेछ । हामीले हरेक परियोजना सरकारको समन्वयमै सम्पन्न गर्न सकेका हौं र हाम्रो लक्ष्य, उद्देश्य भनेकै सरकारलाई हरेक क्षेत्रमा सघाउनु हो । र यो अभियान नितान्त सरकारलाई सघाउन गरिएको अभियान हो । यसमा नेपाल सरकारले गम्भीरतापूर्वक साथ, सहयोग अनि समन्वय गर्नेछ भन्नेमा हामी विश्वस्त छौं”, धुर्मुसले भनेका छन् । सबै मिलेर निर्धारित समयभित्रै अन्तर्राष्ट्रियस्तरको क्रिकेट स्टेडियम बनाउन सकिने र विश्वमा नेपाल चिनाउने अझै धेरै खेलाडीहरु उत्पादन गर्न सकिने दृढता पनि व्यक्त गरेका छन् ।

“यसले सिंगो खेल जगतलाई मात्रै लाभ हुने होइन कि नेपाललाई नै आर्थिक समृद्धितर्फ अघि बढाउन पनि महत्वपूर्ण भूमिका खेल्नेछ । किनकि यो एउटा सुन्दर पर्यटकीय गन्तव्य पनि हुनेछ”, धुर्मुसको आशा छ । राष्ट्रिय तथा अन्तर्राष्ट्रिय प्रतियोगिता भइरहँदा विश्वभरिबाट खेलका पारखीहरु अनि खेलाडीहरु नेपाल भित्रिँदा देशलाई महत्वपूर्ण आर्थिक लाभ मात्रै नभएर देशका हरेक महत्वपूर्ण सम्पदाहरुको प्रचार पनि स्टेडियमकै माध्यमले हुने धुर्मुसको विश्वास छ । देशका हरेक क्षेत्र फष्टाउनमा यसले अहम् भूमिका खेल्ने बताउँदै धुर्मुसले यस्तो प्रश्न गरेका छन्, “हामी नेपालीका लागि दुबै परियोजना महत्वपूर्ण छन्– नमूना नेपाल अनि क्रिकेट स्टेडियम । अब भन्नुहोस कुन चाहिँ पहिला ?”

https://www.facebook.com/sitaramkattelofficial/posts/2058494730831982