पोखरामा नालीमा बगेर एकजना बेपत्ता

५ कात्तिक, पोखरा । पोखरामा शनिबार राति परेको वर्षापछि नालीमा आएको भेलमा परी एक जना बेपत्ता भएका छन् भने एक जना घाइते भएका छन् ।

मोटरसाइकल पल्टिदा नालीमा परेका एक जना बेपत्ता हुन् ।

पानी परिरहेको समयमा शनिबार राति ९ बजे पोखरा लेखनाथ महानगरपालिका-१६ लामाचौरबाट बगरतर्फ आइरहेका बेला उपल्लो दीपस्थित गोर्खा बोर्डिङ स्कूल नजिकै बाइक नालिमा पल्टिदा पोखरा लेखनाथ महानगरपालिका वडा नम्बर १९ निवासी समानसिंह पुनका छोरा पिजन पुन बेपत्ता भएका हुन् ।

उनीसँगै मोटरसाइकलमा सवार दीपक पूर्जा भने सामान्य घाइते भई उपचाररत छन् ।

इञ्जिनिरिङ अध्ययन संस्थान लामाचौर नजिकबाट नालिमा खसेको बाइक करीब २५० फुट तल उपल्लो दीपस्थित गोर्खा बोर्डिङ स्कूल नजिक फेला परेको वडा नम्बर १६ का वडाध्यक्ष जीवन आचार्यले जानकारी दिए ।

बाइक कन्ट्रोलमा नहुँदा दरखराउँदै नालीमा खसेको र रगडिदै बगेको देखिएको उनले बताए । बाइकबाट लडेका पुन बाइकसँगै नालीमा खसेका थिए भने पूर्जा उछिट्टएिर बाटोमा बजारिएका थिए ।

घाइते पूर्जाको बोली पहिलेदेखि नै नबुझिने भएकाले दूर्घटनाको अनुसन्धानमा समेत कठिनाई भएको बताइएको छ । बेपत्ता पुनका खोजी भइरहेको वडा प्रहरी कार्यालय बगरले जनाएको छ ।

नाली अन्डरग्राउण्ड भएकाले निकाल्न समस्या भएको वडाध्यक्ष आचार्यले बताए । बाइक नकाटी ननिस्कने बताउँदै उनले बाइक नकाटी निकाल्ने हो भने नालीको ढलान भत्काउनु पर्ने र त्यो बाइकको मूल्य भन्दा पनि महङ्गो पर्ने बताए । यद्यपी प्रहरीले निकाल्ने प्रयास गरिरहेको जानकारी दिए ।

यसैबीच, कास्कीको मादी गाउँपालिका भाचोकबाट पोखरा आउँदै गरेको ग.१ ज.५७०२ नम्बरको जीप मादी गाउँपालिका वडा नम्बर १० थुम्सीकोटस्थित मकैखोलाको ओरालोमा दूर्घटना हुँदा १ जना घाइते भएका छन् ।

ब्रेक फेल भई ढिस्कोमा धस्सिदा स्थानिय कृष्ण पौडेल घाईते भएका हुन् । उनको हातमा चोट लागेको र स्थानिय अस्पतालमा उपचार भइरहेको कास्कीका प्रहरी प्रवक्ता प्रहरी नायव उपरिक्षक खड्कबहादुर खत्रीले जानकारी दिए । जीपमा सवार अन्य ८ जना भने सकुशल रहेको प्रहरीले जनाएको छ ।