नेपाल टेलिकमकी प्रबन्ध निर्देशक कामिनी पदमुक्त

काठमाडौ साउन,२९ । नेपाल सरकारको आज बसेको मन्त्रिपरिषद्को निर्णयले  नेपाल टेलिकमकी प्रबन्ध निर्देशक कामिनी राजभण्डारीलाई हटाएको छ। उनलाई हटाउने निर्णय गरेको सञ्चार तथा सूचना प्रविधिमन्त्री गोकुल बाँस्कोटाले बताए।

सरकारले मध्यपहाडी लोकमार्गमा अप्टिकल फाइबल बिछ्याउने ठेक्का दिएको १ बर्षसम्म काम नै सुरु गर्न नसकेको बिषयदेखि काठमाडौं र पोखरामा फोरजीको ठेक्का दिने क्रममा टेण्डर नगरी अपारदर्शी रुपमा दिएको कुरा समेत उल्लेख गरिएको छ।

अघिल्लो मन्त्रिपरिषद्को बैठकले उनीसँग स्पष्टिकरण सोधेको थियो। उनको काम सन्तोषजनक नभएको भन्दै हटाउने निर्णय गरेको हो।

२०७३ असोजमा उनी तीन वर्षको लागि नेपाल टेलिकमको प्रबन्ध निर्देशकमा नियुक्त भएकी थिइन् ।  उनी पहिलो पटक खुला प्रतिस्पर्धाबाट छानिएकी प्रबन्ध निर्देशक पनि हुन् । उनी टेलिकमको पहिलो महिला प्रबन्ध निर्देशक हुन् ।

उनी पदमुक्त भएसँगै अब सरकारले नयाँ प्रवन्ध निर्देशक नियुक्ति प्रक्रिया अघि बढाउने बताइएको छ ।