प्रकाश दाहालको स्मृतिमा खुल्ला बक्सिङ प्रतियोगिता

काठमाडौं, १४ असार । स्व. प्रकाश दाहालको स्मृतिमा खुल्ला बक्सिङ प्रतियोगिता शुरु भएको छ ।

नेपाल बक्सिङ संघको तत्वावधान र अखिल नेपाल खेलकूद संघको आयोजनामा आजदेखि लैनचौरमा सो खेल शुरु भएको हो । कार्यक्रमको उदघाटन गर्दै गृहमन्त्री रामबहादुर थापा “बादल”ले स्व. दाहाल नेपालको कम्युनिष्ट आन्दोलनमा होनहार युवा भएको बताए । “स्व. दाहालको सपना समृद्ध नेपाल निर्माणको थियो । त्यो सपनालाई पूरा गर्न अहिले सरकार लागिरहेको छ”, गृहमन्त्री थापाले भने ।

गृहमन्त्री थापाले खेलले युवालाई एकापसमा एकताको भावना निर्माण गर्ने र स्वास्थ्यका लागि समेत फाइदा हुने बताए । गृहमन्त्री थापाले खेलमा जितहार हुने तर खेलको माध्यमबाट देश निर्माणमा महत्वपूर्ण भूमिका पुग्ने विश्वास व्यक्त गरे ।

विश्वभर लोकप्रिय खेलका रुपमा रहेको बक्सिङलाई नेपालमा पनि लोकप्रिय खेलका रुपमा लिइन्छ । आगामी १७ गतेसम्म चल्ने प्रतियोगितामा २५ जिल्लाका १५० भन्दा बढी खेलाडीको सहभागिता रहेको छ । जसमा पुरुषको १० समूह र महिलाको ८ समूह रहेको आयोजकले जनाएको छ ।

नेपाल कम्युनिष्ट पार्टीका अध्यक्ष पुष्पकमल दाहाल “प्रचण्ड”का सुपुत्र प्रकाश दाहालको २०७४ मंसिर ३ गते निधन भएको थियो ।