प्रधानमन्त्री ओलीको सम्बोधनप्रति २ नम्बर प्रदेशका राज्यमन्त्रीद्वारा कडा आपत्ति

काठमाडौं, २ भदौ । प्रधानमन्त्री केपी शर्मा ओलीले प्रदेश २ को प्रदेशसभालाई आज गरेको सम्बोधनप्रति २ नम्बर प्रदेशका एक राज्यमन्त्रीले नै कडा आपत्ति जनाएका छन् । प्रधानमन्त्रीको सम्बोधनलाई २ नम्बर प्रदेशका सामाजिक व्यवस्था राज्यमन्त्री सुरेश मण्डलले “नेकपा सरकारको संघीयतामाथि लगाम लगाउने पहिलो प्रयास हो” भनेका छन् ।

राज्यमन्त्री मण्डलले सामाजिक सञ्जालमार्फत ओलीको सम्बोधन असान्दर्भिक र अनुपयुक्त रहेको बताएका छन् । “प्रधानमन्त्री सम्माननीय केपी शर्मा ओलीज्यूको आज हुने भनिएको प्रदेशसभा– २ को सम्बोधन असान्दर्भिक र अनुपयुक्त छ । यो नेकपा सरकारको संघीयतामाथि लगाम लगाउने पहिलो प्रयास हो”, उनले भनेका छन् ।

सामाजिक सञ्जालमा राज्यमन्त्री मण्डलले थपेका छन्, “संघीय सरचनाको विशेषता अर्थात प्रादेशिक स्वायत्तताबिरुद्धको यो कम्युनिष्ट सर्वसत्तावादको पहिलो एपिसोड हो । जसको म साक्षी बन्न सक्दिन ।”

मधेस आन्दोलन, मधेसी सहिद र मधेसी जनताको भावनालाई सम्मान गर्दै सम्बोधनको कार्यक्रम फिर्ता लिन पनि उनले आग्रह गरेका थिए । प्रादेशिक स्वायत्ततालाई सम्मान गर्न ओलीसँग राज्यमन्त्री मण्डलले अनुरोध समेत गरेका थिए । यद्यपि, प्रधानमन्त्री ओलीले प्रदेश नं. २ लाई सम्बोधन गरेका छन् ।