प्रधानमन्त्री केपी शर्मा ओलीसँग भारत जाने तीन मन्त्री को को ?

काठमाडौं, २० चैत । प्रधानमन्त्री केपी शर्मा ओलीको भारत भ्रमण टोलीमा तीनजना मन्त्री सहभागी हुने भएका छन् । मन्त्रिपरिषदको मंगलबारको बैठकले प्रधानमन्त्रीको भ्रमण टोलीमा तीनजना मन्त्री सहभागी हुने निर्णय गरेको सञ्चार तथा सूचना प्रविधि राज्यमन्त्री गोकुल बास्कोटाले जानकारी दिएका छन् ।

प्रधानमन्त्रीको भ्रमण टोलीमा परराष्ट्रमन्त्री प्रदीप ज्ञवाली, अर्थमन्त्री डा. युवराज खतिवडा र उद्योग वाणिज्य तथा आपूर्ति मन्त्री मातृका यादव रहने छन् । अर्थमन्त्री खतिवडा र उद्योग वाणिज्य तथा आपूर्ति मन्त्री यादव काठमाडौँबाट प्रधानमन्त्रीसँगै दिल्ली जाने छन् । परराष्ट्र मन्त्री प्रदीप ज्ञवाली भने अजरबैजानबाट सिधै दिल्ली पुग्नेछन् ।

परराष्ट्र मन्त्री ज्ञवाली अजरबैजानमा हुने असंलग्न राष्ट्रहरूको मन्त्रिस्तरीय सम्मेलनमा सहभागी हुन अजरबैजान जाँदैछन् । मन्त्रिस्तरीय सम्मेलन चैत २२ र २३ मा हुँदैछ । प्रधानमन्त्री ओली चैत २३ गते नेपाली प्रतिनिधि मण्डलको नेतृत्व गर्दै भारतको राजकीय भ्रमणमा जाँदै छन् ।