ब्लकेड वाज क्राइम मिष्टर मोदी’ ट्रेण्डिङले भारतीय दूतावासमा तरङ्ग !

काठमाडाै, २७ वैशाख । घटना प्रधानमन्त्री केपी शर्मा ओलीको ट्वीटले एमाले–माओवादी केन्द्रबीच हलचल सिर्जना गरिरहेकै दिनको हो। अघिल्लो दिन (२४ बैशाख) का दिन प्रधानमन्त्री ओलीले ‘सत्ता समीकरण परिवर्तनमा वानी परेकाहरुले बिकास र सम्बृद्धि नचाहेको’ भन्दै ट्वीट गरेपछि माओवादी केन्द्रका अध्यक्ष पुष्पकमल दाहाल (प्रचण्ड) को मनमा जस्तो तरङ सिर्जना भइरहेको थियो, त्यस्तै तरङ्ग अर्काे एउटा ट्वीटका कारण लैनचौरस्थित भारतीय राजदूतावासभित्र पनि हुँदै थियो।

शुक्रवार (भोलि)देखि हुने भारतीय प्रधानमन्त्री नरेन्द्र मोदीको दुई दिने नेपाल भ्रमण (२८–२९ बैशाख) को सन्दर्भमा तीन वर्षअघिको भारतीय नाकाबन्दीपीडित नेपालीले एउटा ‘ह्यासट्याग ब्लकेड वाज क्राइम मिस्टर मोदी’ ट्विटरमा ट्रेन्डिङ गराइरहेका छन्। र, २६ बैशाखदेखि यो ह्यासट्याग ट्विटरमा पहिलाे नम्बरमा ट्रेण्डिङ गरिरहेकाे छ।

यसै हप्तादेखि सुरु भएको यो ह्यासट्यागलाई धेरैले प्रयाेग गर्दै ट्रेण्डिङमा अाएपछि भारतीय दूतावास तनाबमा पर्नु स्वभाविकै थियो। त्यसैले, त्यो ट्रेण्डिङ गर्ने अभियानकर्ताको खोजी भारतीय दूतावासले गर्न थाल्यो। राजदूत मञ्जितसिंह पुरी आफैले पनि अभियानकर्ता को-को हुन् भन्ने कुराको खोजी गर्न थाले। तिनमा विश्वदीप ह्याण्डल भएका अभियानकर्ता भेटिए।

के यी तिनै विश्वदीप पाण्डे हुन्, जो नयाँ शक्ति नेपालका संयोजक डा. बाबुराम भट्टराईको लामो समय सहयोगी थिए? भारतीय दूतावास पुगेका रिपोटर्स क्लब नेपालका अध्यक्ष ऋषि धमलासँग राजदूत पुरीले कन्फर्म गर्न खोजे, ‘को हो यो विश्वदीप?’ धमलाले जवाफ दिए, ‘उनी लामो समय डा. बाबुराम भट्टराईको पिए भएका व्यक्ति हुन्। अहिले नयाँशक्तिको प्रचार विभाग प्रमुख छन्।’

त्यसपछि राजदूत पुरीले धमलाकै अघिल्तिरबाट डा. भट्टराईलाई फोन गरे। र, नेपाल भ्रमणका क्रममा मोदीले पूर्व प्रधानमन्त्रीहरुसँग पनि भेटघाट गर्ने कार्यक्रम रहेको जानकारी गराए। ‘त्यस सम्बन्धमा तपाईंलाई पनि निम्तोपत्र आइसक्यो होला’ भन्दै पुन निश्चय (रिकन्फर्म) का लागि फोन गरेको जानकारी दिए। आफूले डा भट्टराईसँग ‘समथिङ इज रङ, प्लिज चेक योर सेक्रेटरी’ भनेको पुरीले निकटस्थहरुलाइ सुनाए।

स्रोतका भनाईमा, राजदूतले फेरि यताबाट ‘समथिङ इज रङ, प्लिज चेक योर सेक्रेटरी’ भनेका थिए। स्रोतको दावी के छ भने, त्यसपछि राजदूत पुरीले ‘विश्वदीप’ भन्ने जवाफ दिएको सुनियो। धमलाका भनाईमा, उनीसँग राजदूत पुरीले विश्वदीप को हो भनेर सोधेका थिए। धमलाले नेपालखबरसँग भने, ‘उनी लामो समयदेखि डा भट्टराईको सेक्रेटरी हुन् भनें र अहिले नयाँशक्ति नेपालको प्रचार विभाग प्रमुख छन् भनेर भनें।’

खासमा राजदूत पुरीले आशंका गरेका विश्वदीप हाल नयाँशक्ति नेपालको प्रचार विभाग प्रमुख एवं डा. भट्टराईका पूर्व स्वकीय सचिव विश्वदीप पाण्डे थिएनन् नेपाल खवरमा समाचार छ। उनी कान्तिपुर टेलिभिजनमा कार्यरत रही केही समयअघिमात्र जागिर छाडेका विश्वदीप लामिछाने हुन्, जसले अहिले ‘ह्यासट्याग ब्लकेड वाज क्राइम मिष्टर मोदी’ लाई ब्यापक बनाउन ट्विटरमा अभियान चलाइरहेका छन्।

डा.भट्टराई र राजदूत पुरीबीच विश्वदीपबारे थप कुनै कुराकानी भयो कि भएन, त्यो त थाहा छैन। तर भारतीय राजदूत अहिले के कुरामा प्रष्ट भइसकेका छन् भने, उनले आशंका गरेका ती व्यक्ति नयाँशक्तिको प्रचार विभाग प्रमुख रहेका विश्वदीप पाण्डे चाहिँ होइनन्।

उता, अर्का विश्वदीप चाहिँ त्यो ट्रेण्डिङलाई व्यापक बनाउन रातदिन लागिरहेकै छन्। र, बुधबारदेखि यो ह्यासट्याग ट्रेण्डिङको पहिलो नम्बरबाट तल नझरेपछि भारतीय राजदूतकाे तनाब झन बढेकाे छ।