माओवादी पार्टी कार्यालय नियन्त्रणमा लिए स्वतन्त्र सांसद छक्कबहादुरले

हुम्ला, मंसिर २७ –माओवादी केन्द्र हुम्लाको विवाद चुलिएको छ । दुई पक्षमा विभाजित माओवादी केन्द्रका कार्यकर्ताले पार्टी कार्यकर्ता नियन्त्रणमा लिने प्रयास गरेका छन् ।

हुम्ला जिल्लाको प्रतिनिधिसभा सदस्य स्वतन्त्र उम्मेदवार छक्कबहादुर लामाले पार्टीको निर्णयविरुद्ध उम्मेदवार दिनुभएको थियो । माओवादीका बागी उम्मेदवार लामा नै हुम्लाबाट विजयी हुनुभएको थियो । वाम गठवन्धनका आधिकारिक उम्मेदवार तथा माओवादी केन्द्रका जिल्ला इन्चार्ज छिमी लामाले छक्कबहादुर लामालाई कारबाहीका लागि सिफारिस गर्नुभएको थियो । कारबाही सिफारिस गरिएको भोलिपल्ट विज्ञप्ति निकाल्दै नवनिर्वाचित लामासहित उनका समर्थकले पार्टी कार्यालयको ताला तोड्दै नियन्त्रणमा लिएका हुन् ।

आफनो पक्षमा नेता तथा कार्यकर्ता, वाम गठवन्धनको पूर्ण समर्थन रहेकोले आफूहरु आधिकारिक भएकोले निर्वाचन जितेको नव निर्वाचित प्रतिनिधिसभा सदस्य छक्कबहादुर लामाले पत्रकार सम्मेलनमा बताउनुभयो । आफू माओवादी केन्दकै एक कार्यकर्ता भएकोले जिल्लामा अधिकांश नेता कार्यकर्ताको समर्थन जनताको न्यायले आफूले स्वतन्त्र भएर जितेको समेत दाबी गरेका छन् ।

४ सय जिल्ला कमिटी सदस्यमध्ये ३ सय सदस्य आफ्नो पक्ष भएकोले आफनो पक्ष नै माओवादी केन्द्र भएको दावी गर्दै पार्टी कार्यलयको वुधवार दिउसो लगाएको ताला तोड्दै विजयी लामासहित उनका समथर्कले आफनो पक्षको ताला लगाई नियन्त्रणमा लिएका छन् ।

जिल्ला इन्चार्ज छिमी लामाले मंगलवार स्वतन्त्र उम्मेदवार भै विजय भएका छक्कबहादुर लामासहित उनका समर्थक १२ जनालाई कारबाहीको लागि पार्टीको केन्द्रलाई सिफारिस गर्नुभएको थियो ।