रक्सी खान नपाउने भए श्रीलंकन !

श्रीलंकामा महिलाले रक्सीजन्य मादकपदार्थ किन्न पाउने गरि ल्याइएको कानुन खारेज गरिएको छ । पुरुष सरह महिलाले पनि रक्सी किन्न पाउने गरी बनेको कानुन राष्ट्रपति मैत्रिपाला सिरिसेनाले निष्क्रिय भएको घोषणा गरेका हुन् । यसअघि सरकारले महिलाले पनि पुरुषले सरह रक्सी किन्न पाउने गरी नियम ल्याएको थियो । तर राष्ट्रपति सिरिसेनाले त्यो नियम फिर्ता लिन सरकारलाई निर्देशन दिएका थिए । नयाँ नियममा महिलाले बारमा काम गर्न पाउने व्यवस्था पनि गरिएको थियो ।

तर अब महिलाले बिना पूर्वस्वीकृति बारमा काम गर्न पनि नपाउने भएका छन् । राष्ट्रपति सिरिसेनाले नयाँ नियमका बारेमा आफूले पत्रपत्रिकाबाट थाहा पाएको बताएका छन् । यो थाहा पाउने बित्तिकै आफूले नियम फिर्ता लिन निर्देशन दिएको उनले बताए । श्रीलंका सरकारले गएको बुधबार महिलाले रक्सी किन्न तथा बारमा काम गर्न नपाउने गरी सन् १९५५ मा बनेको कानुनले महिलामाथि विभेद गरेको भन्दै परिमार्जन गरेको घोषणा गरेको थियो । तर राष्ट्रपतिले सरकारको कदममा हस्तक्षप गर्नुभएको हो । राष्ट्रपतिले लैंगिक समानताको कुरालाई गम्भीर रुपले नलिएको धेरैले आरोप लगाएका छन् ।