विभाजन रोक्न प्रचण्डले ओलीसँग निर्णायक वार्ता गर्ने
सारांश
- काठमाडौं, १८ कात्तिक ।
- नेपाल कम्युनिस्ट पार्टीका अध्यक्ष पुष्पकमल दाहाल प्रचण्डले अर्का अध्यक्ष केपी शर्मा ओलीसँग निर्णायक वार्ता गर्ने भएका छन् ।
- दुई नेताबीच टेलिफोन कुराकानी भई निर्णायक वार्ता गर्ने सहमति भएको हो ।
काठमाडौं, १८ कात्तिक । नेपाल कम्युनिस्ट पार्टीका अध्यक्ष पुष्पकमल दाहाल प्रचण्डले अर्का अध्यक्ष केपी शर्मा ओलीसँग निर्णायक वार्ता गर्ने भएका छन् । दुई नेताबीच टेलिफोन कुराकानी भई निर्णायक वार्ता गर्ने सहमति भएको हो ।
प्रचण्ड निकट स्थायी कमिटी सदस्य देवेन्द्र पौडेलका अनुसार दुवै नेताले सहमति निकाल्न महत्वपूर्ण छलफल गर्ने सहमति गरेका छन् । यसका लागि दुवैबीच टेलिफोन वार्ता भएको हो ।
वरिष्ठ नेता माधवकुमार नेपालले प्रचण्डलाई भेटी ओलीसँग एकपटक वार्ता गर्न आग्रह गरेका थिए । पार्टीलाई कुनै हालतमा विभाजनबाट जोगाउन नेपाल सक्रिय भएसँगै वार्ताको वातावरण निर्माण भएको हो । प्रचण्डले पनि पार्टी विभाजन हुन नदिन अन्तिम समयसम्म पहल गर्ने निकटस्थसँगको छलफलमा भनेका छन् ।
नेकपाभित्रको दोस्रो पुस्ताका नेताहरु पार्टी एकता बचाउन सार्वजनिक रुपमा अपिल गर्दै सक्रिय भएका छन् । सचिवालय सदस्य ईश्वर पोखरेल, महासचिव विष्णु पौडेल, स्थायी कमिटी सदस्य शंकर पोखरेललगायतले पार्टी बचाउन अपिल गरिसेका छन् । प्रचण्ड र माधव नेपालनिकट दोस्रो पुस्ताका नेताहरु पनि पार्टी विभाजन रोक्न सक्रिय भएका छन् ।
यसअघि ओलीले प्रचण्डसँगको भेटमा अलग भएर जाने प्रस्ताव गरेको विषय बाहिर आएको थियो । यसलाई प्रचण्डले निकटस्थलाई डाकेर ब्रिफिङ गरेका थिए ।
अहिले नेकपाभित्र सचिवालय, स्थायी कमिटी र केन्द्रीय कमिटीमा ओली अल्पमतमा छन् । तर, संसदीय दलमा ओलीको बहुमत दाबी रहँदै आएको छ ।
प्रतिक्रिया