सम्झौतापरस्त नीति र गलत कार्यशैलीले सरकार जनघाति मार्गतर्फ उन्मुख : राजमो

यातायात भाडामा १० प्रतिशत बृद्धि तुरुन्त फिर्ता गर्न माग

काठमाडौं, १० असोज । राष्ट्रिय जनमोर्चाले हालै सार्वजनिक यातायातको भाडामा १० प्रतिशतले बृद्धि गरिएकोप्रति गम्भीर आपत्ति जनाउँदै त्यसलाई तुरुन्त फिर्ता गर्न माग गरेको छ । पार्टीका प्रवक्ता तथा सांसद दुर्गा पौडेलले विज्ञप्ति जारी गरी यातायात क्षेत्रमा रहेको सिण्डीकेट अन्त्य गर्ने घोषणा गरिरहेका बेलामा गरिएको भाडाबृद्धिलाई सरकारको सम्झौतापरस्त नीति भनेकी छन् ।

“दशैं तिहार जस्तो चाडबाडको बेला यात्रुहरूलाई गम्भीर असर पर्ने गरी गरिएको भाडा बृद्धिलाई तुरुन्त फिर्ता लिन राष्ट्रिय जनमोर्चा माग गर्दछ”, विज्ञप्तिमा भनिएको छ । सरकार र यातायात व्यवसायीका बीचमा भएको सम्झौतापछि नै सार्वजनिक यातायातमा यसरी भाडा बृद्धि गरिएको बताउँदै सरकारले यसअघि पेट्रोलियम पदार्थमा पटकपटक मूल्यबृद्धि गर्दै आएको र दशै
तिहार जस्ता चाडपर्वको मुखैमा भाडाबृद्धिले सर्वसाधारण जनतालाई गम्भीर असर पार्ने विज्ञप्तिमा उल्लेख छ ।

“मानिसहरू सार्वजनिक यातायातमा सर्वाधिक ओहरदोहर गर्ने यो मौसममा यातायात क्षेत्रमा भाडा बृद्धिले सर्वसाधारण जनताको जीवनमा गम्भीर असर पर्ने निश्चित छ”, विज्ञप्तिमा भनिएको छ । सरकारको यातायात क्षेत्रमा सिण्डीकेट अन्त्यको घोषणा एक सकारात्मक कार्य थियो भन्दै अहिले यातायात व्यवसायीसँग सम्झौता गरेर यातायातमा १० प्रतिशतले भाडा बृद्धि गर्न दिनुले सरकारको सम्झौतापरस्त नीतिलाई नै उजागर गरेको आरोप लगाइएको छ । पछिल्लो समयमा सरकारले अपनाउँदै गएको सम्झौतापरस्त नीति र गलत कार्यशैलीले ऊ जनघाति मार्गतर्फ उन्मुख हुँदै गएको प्रष्ट भएको विज्ञप्तिमा उल्लेख छ ।