सरकारी ढुकुटीमा दोहन, नेताहरुले कार्यकर्ता पोस्दै

काठमाडौं, १६ माघ- सरकारे आर्थिक सहायता शीर्षकमा एक वर्षलाई छुट्याएको बजेटसहित थप साढे ७ करोड रुपियाँ ६ महिनामै दलका नेता कार्यकर्तालाई बाँडेको छ । आर्थिक वष २०७४।०७५ का लागि सरकारले आर्थिक सहायता शीर्षकमा २५ करोड रुपियाँ छुट्याएको भएपनि शेरबहादुर देउवा नेतृत्वको सरकारले पहिलो ६ महिनामै साढे ३२ करोड रुपियाँ खर्च गरिसकेको खबर आजको नागरिक दैनिकमा सुरेन्द्र पौडेलले लेखेका छन् ।

‘आर्थिक सहायताका शीर्षकमा यो आर्थिक वर्षका लागि छुट्याइएको रकमले पहिलो ६ महिनालाई पनि पुगेन,’ अर्थमन्त्रालय स्रोतले भन्यो, ‘देश त त्यसै ऋणमा चलेको छ, झन् यसरी आर्थिक सहायताका नाममा दलका पहुँचवाला नेता तथा कार्यकर्तालाई जथाभावी रकम बाँड्ने हो भने अर्थतन्त्रको अवस्था के होला ?’

पछिल्लो पटक अर्थ मन्त्रालयले सोमबार ६ करोड ५३ लाख ५० हजार रुपियाँ आर्थिक सहायताका लागि गृह मन्त्रालयलाई रकम निकासा दिएको छ । सरकारले गत पुस १३ गते ३ सय ४५ जनालाई आर्थिक सहायतास्वरुप उक्त रकम दिने निर्णय गरेको थियो ।

सरकारमा रहँदा कसले कति बाँडे ?

शेरबहादुर देउवाले ३९ करोड ८१ लाख ९० हजार
पुष्पकमल दाहालले ५९ करोड ४६ लाख ७१ हजार
केपी ओलीले १२ करोड २५ लाख १३ हजार