सिंगापुरे अर्बपतिकी छोरी भन्दै भारतीय ठग्ने नेपाली युवती ‘डायना सेकेण्ड’

‘उच्च खानदानको हुँ’ भन्दै भारतीय व्यापारी ३८ वर्षीय श्रीपाल जैनलाई ठगी गर्ने महोत्तरी औरी–३ का २१ वर्षीय डायना सेकेण्डलाई प्रहरीले पक्राउ गरेको छ । भारत महाराष्ट्र फलबरका जैनसँग उनले २३ लाख रुपैयाँ ठगी गरेकी थिइन् । उनलाई महानगरीय अपराध महाशाखाबाट खटिएका प्रहरी टोलीले नरेफाँटबाट पक्राउ गरेको हो ।

डायनाको कोठा खनतलासी गर्ने क्रममा उनको साथबाट ठगी गरिएको मध्ये २० लाख ८० हजार रुपैयाँ, डायना सेकेण्ड लेखिएको राहदानीलगायतका सामाग्री बरामद भएको थियो । प्रहरीका अनुसार उनले जैनलाई नेपाल बोलाएकी थिइन् । यही क्रममा उनले २३ लाख रुपैयाँ लिएर फरार भएकी थिइन् ।
महाशाखा प्रमुख एसएसपी शहकुल थापाले भने, ‘खानदानी परिवारको भन्दै जैनलाई भ्रममा पारेछ । जैन नेपाल आए छ । यही क्रममा २३ लाख रुपैयाँ लिएर फरार भएछ । खोज तलासपछि उनलाई हामीले पक्राउ गरेका छौँ ।’

प्रहरीका अनुसार डायनाले फेसबुकमार्फत जैनसँग सम्बन्ध बढाएका थिए । खानदानी रहेको र सम्पतीको वारेसनामा आफू मात्रै रहेको भन्दै जैनसँग नजिकिएकी थिइन् । यही क्रममा उनले जैनलाई नेपाल बोलाइन् । केही दिनसँगै बसे । मुम्बई फर्कने क्रममा दुवै जना त्रिभुवन अन्तर्रा्ष्ट्रिय विमानस्थल पुगे । विमान स्थलमा डायनाले बहुमूल्य वस्तु भन्सारमा अड्किएकाले भन्सार क्लियर गर्न जैनसँग २३ लाख रुपैयाँ मागे । जैनले तुरुन्तै मागे बमोजिमको रकम दिए । रकम लिएपछि उनी बेपत्ता भइन् । आफू ठगिएको भेउ उनले बल्ल पाए ।

मनसुन पुग्यो पश्चिम
पूर्वबाट चार दिनअघि नेपाल प्रवेश गरेको मनसुन पश्चिम क्षेत्रसम्म फैलिएको छ । देशका पश्चिम क्षेत्रमा आइतबार बेलुका तिरै मनसुन पुगेको जल तथा मौसम पूर्वानुमान महाशाखाले जनाएको छ । अब बिस्तारै मनसुनी गतिविधि बढ्दै जाने जनाइएको छ ।

मौसमविदका अनुसार सोमबार देशभरकै मौसम आंशिकदेखि समान्यत बदली हुनेछ । आइतबारको तुलनामा केही कम रहे पनि देशभरको मौसम बदली हुने देखिएको मौसमविद मीनकुमार अर्यालले बताएका छन् ।

पूर्व र पश्चिमका केही स्थानमा वर्षाको सम्भावना रहेको छ । यस्तै काठमाडौँ उपत्यकासहित मध्य क्षेत्रका थोरै स्थानमा वर्षाको सम्भावना रहेको मौसमविद अर्यालले बताए । बिहान खुलेको जस्तो देखिए पनि मौसम बदली हुनेछ ।