सुत्केरी आमाको दुर्घटनामा मृत्यु, ३ दिनको बच्चा सकुशल

काठमाडौं । बिहीबार साँझ पाल्पामा भएको जिप दुर्घटनामा मृत्यु हुनेहरुको सनाखत भएको छ । एकजना तीन दिनकी सुत्केरीसमेत दुर्घटनामा मृत्यु भएको छ । उनको ३ दिनको बच्चा भने सकुशल रहेको प्रहरीले जनाएको छ ।

मृतक सबै माथागढी–८ बहादुरपुरका हुन् । तानसेनबाट जल्पा हुँदै बहादुरपुर जाँदै गरेको लु१ज २६५३ नं को जिप आर्गिडाँडाको ओढारेमा दुर्घटना हुँदा पाँच जनाको मृत्यु भएको पाल्पा जिल्ला प्रहरी कार्यालयले जनाएको छ ।

हिजो साँझ करीब ८ बजे भएको दुर्घटनामा चालक वर्ष २० का वीरेन्द्र राना, वर्ष ४४ की यानीसरा गाहा, वर्ष २३ की कुनीसरा रुचाल, ७१ वर्षका रेवतबहादुर जिसी र ४१ बर्षकी तीन दिनकी सुत्केरी भूमिकुमारी दर्लामीको मृत्यु भएको छ । सुत्केरी दर्मामीको तानसेनस्थित लुम्बिनी मेडिकल कलेजमा उपचारको क्रममा मृत्यु भएको थियो । तीन दिनको बच्चा भने सकुशल रहेको अस्पताल जनाएको छ ।

रातिको समयमा साँघुरो र अप्ठ्यारो बाटो हुँदा भित्तामा ठोक्किएर दुर्घटना भएको हुनसक्ने पूर्वखोला–२ का वडाध्यक्ष नीरबहादुर सारुले जानकारी दिनुभयो । अन्य घाइतेको मिसन अस्पतालमा उपचार भइरहेको छ ।