सुन तस्करी प्रकरण : यी परिचित वकिल जाे अभियुक्तसँग पैसा लिएर अदालत पुगे !

काठमाडौं, ३० वैशाख । मोरङ जिल्ला अदालतमा तीन वर्षमा त्रिभुवन अन्तर्राष्ट्रिय विमानस्थलबाट ३८ क्विन्टल सुन तस्करी गर्नेविरुद्ध थुनछेक बहस जारी छ ।

गृह मन्त्रालयको उच्चस्तरीय छानविन समिति टोलीको छानविन पछि जिल्ला सरकारी वकिलको कार्यालय मोरङ र हत्या गरिएका भरिया सनम शाक्य परिवारले अभियोगपत्र दायर गरेको थियो ।
६३ जनाविरुद्ध अभियोगपत्र दायर भए पनि हिरासतमा रहेका २९ जनामाथि थुनछेक बहस जारी रहेको हो । यस प्रकरणमा अभियुक्तका तर्फबाट नेपालका भेट्रान वकिलले बहसमा भाग लिएका छन् । मोटो रकम पारिश्रमिक लिने शम्भु थापा, पूर्वमहान्यायाधीवक्ता रमण श्रेष्ठ, अधिवक्ता सुशिल पन्तलगायतले अभियुक्तका तर्फबाट बहसमा सहभागीता देखाएका छन् ।

सरकारवादी मुद्दामा कानुन र कार्यपालिकामा प्रत्यक्ष अप्रत्यक्ष व्यक्तित्वका हिसावले प्रभाव राख्न सक्ने कानुन व्यावसायी अभियुक्तका तर्फबाट बहसमा उत्रिए पछि अदालतमा सुन तस्करी काण्डमो मुद्दा कमजोर बन्ने आशंका गरिएको छ ।

यी व्यावसायीले मुख्य अभियुक्त गोरे भनिने चुडामणि उप्रेती पक्राउ नगरेसम्म अभियुक्तहरूको संलग्नताको अपराधमा कम भन्दा कम सजायका लागि बहस पैरवी गर्ने आशंका गरिएको छ ।
एकजना कानुन व्यावसायीले भने, ‘अर्बौं तस्करी काण्डको मुद्दा भएका कारण वकिललाई ठूलो रकममा खरिद गरिएको हुनसक्छ । जसका कारण सरकारका तर्फबाट बहस गर्ने सह–न्यायाधिवक्ता, जिल्ला सरकारी वकिललगायतका जम्मा ८ जना कमजोर सावित हुनसक्छन् ।’
यस प्रकरणका मुख्य अभियुक्त गोरे र विमानस्थलमा सुरक्षाको जिम्मा लिएको तत्कालिन एसएसपी श्याम खत्रीलगायतका ३४ जना फरार छन् ।

‘फरार पक्राउ गरी संलग्नताको पर्याप्त आधार र प्रमाण अगाडी नसार्दा हिरासतमा रहेका अभियुक्तहरूले उन्मुक्ति पाउनसक्ने आधार वकिलले तयार गर्न सक्छन्’, कानुन व्यावसायी भन्छन्,‘कानुनका नौ सिङ हुन्छन् । ति सबै सिङको उचाई र प्रभावकारीता जान्ने वकिल भएपछि परिणाम कस्तो आउँछ रु यसबारे सबैले हेक्का राखेकै हुन्छन् ।’

तत्कालिन प्रहरी महानिरिक्षक नियुक्ति प्रक्रियाका बेला रमण श्रेष्ठ सरकारका तर्फबाट वकिल थिए । सुन प्रकरणका मुद्दामा उनले धेरैवटा मुद्दा हात लिएको बताइन्छ । श्रेष्ठ माओवादी निकट कानुन व्यावसायी हुन् ।

उता थापा भने एमाले सम्बद्ध कानुन व्यावसायी हुन् । उनी ०६४ सालको निर्वाचनमा नेकपा एमालेबाट संविधानसभाका लागि उदयपुरका उम्मेदवार समेत भएका थिए । तर पराजित भए ।