सेनाको बन्दुकको नालमा कलम चलाएको नेपाली पत्रकारिता कुनै ऐनका कारण रोकिन्न : मन्त्री मगर

काठमाडौं, २९ साउन । खानेपानी तथा सरसफाई मन्त्री बिना मगरले भदौ १ गतेदेखि लागू हुने मुलूकी संहिताले पत्रकारलाई समाचार लेख्न नरोक्ने र त्यसले कुनै असर नगर्ने बताएकी छन् । ललितपुरमा मंगलबार आयोजित कार्यक्रममा बोल्दै मन्त्री मगरले त्यस्तो धारणा राखेकी हुन् ।

“पत्रकारले आधारसंगत ढङ्गले समाचार लेख्दा कानुनदेखि डराउनै पर्दैन”, मन्त्री मगरले थपिन्, “सेनाको बन्दुकको नालमा पनि कलम चलाएर आएको नेपाली पत्रकारिता कुनै ऐनका कारण रोकिन्न ।” भदौ १ गतेदेखि लागू हुने ऐनले पत्रकारितालाई अस्तव्यस्त नभएर सुदृढ बनाएर लैजाने विश्वास पनि उनले व्यक्त गरिन् । नयाँ ऐनले पत्रकारिता जगतलाई अवरोध होइन सिर्जनात्मक सहयोग गर्ने र अझै सुदृढ बनाउने विश्वास व्यक्त गरिन् ।

मुलुकी संहितामा अनुमतिबिना कुराकानी रेकर्ड गर्न र फोटो खिच्नेलाई समेत कारवाहीको व्यवस्था गरिएको छ । मुलुकी संहितामा गरिएको उक्त व्यवस्थालाई सञ्चार क्षेत्रले विरोध गर्दै आएको छ ।

यसैगरी मन्त्री मगरले स्थानीय तहले लिन थालेको करको विषयलाई जोडेर संघीयता नै टिक्ने कि नटिक्ने भन्ने बहस गर्नुको कुनै औचित्य नरहेको बताइन् । केहीले कमजोरी गरे होलान् भन्दै उनले थपिन्, “तर, त्यसैलाई आधार बनाएर गाउँगाउँमा सरकार पुगेको बेला संघीयता नै ठीक भएन कि भनेर अपव्याख्या गर्न खोजिदैछ ।”