स्पट फिक्सिङ गम्भीर अपराध हो, निष्पक्ष छानबिन गरी दोषीलाई कडा कारबाही गरियोस् : पारस खड्का

काठमाडाैं । नेपाली राष्ट्रिय क्रिकेट टाेलीका पूर्व कप्तान पारस खड्काले नेपाल टी-२० लिगको निष्पक्ष छानबिन गर्न माग गरेका छन् ।काठमाडौंमा जारी लिगमा स्पट फिक्सिङको घटना बाहिर आएपछि खड्काले निष्पक्ष छानबिन गरेर दोषीमाथि कडा कारवाही गर्न माग गरेका हुन् । स्पट फिक्सिङ गम्भीर अपराध भएकाे खड्काले मंगलबार सामाजिक सञ्जालमा उल्लेख गरेका छन् ।

स्पट फिक्सिङ जस्तो गम्भीर अपराध भएको खबरले आफूलाई स्तब्ध बनाएको उनले उल्लेख गरेका छन् । ‘नेपाल क्रिकेटले विभिन्न अध्याय, संघर्ष र खुड्किलाहरू पार गर्दै राम्रो स्वरूप लिने क्रम जारी थियाे, यो अनवरत यात्रा र उतारचढावकै बीच नेपालटी-२० लिगमा स्पट फिक्सिङ जस्तो गम्भीर अपराध भएको खबरले स्तब्ध बनाएको छ’-खड्काले लेखेका छन् ।

क्रिकेटमा समर्पित सम्पूर्ण सरोकारवालाको विश्वासलाई सो घटनाले चोट पुर्‍याएकाे पनि उनले उल्लेख गरेका छन् । ‘खेलाडीहरूको वर्षौंदेखिको लगाव, खेलप्रेमीहरूको निःस्वार्थ प्रेम र यस खेलमा समर्पित सरोकारवालाहरूको विश्वासलाई यस घटनाले यो खेलसँग सम्बन्धित सबैलाई चोट पुर्‍याएको छ, यो अपराधको निष्पक्ष छानबिन गरेर दोषीलाई कडा कारबाही गरियोस्’- खड्काले लेखेका छन् ।

नेपाल क्रिकेट संघ (क्यान) को आयोजनामा पुस ९ गतेदेखि भइरहेकाे प्रतियोगितामा स्पट फिक्सिङका घटना बाहिर आएका छन् । मंगलबार मात्रै काठमाडौं नाइट्सका कप्तान ज्ञानेन्द्र मल्लले आफ्नो टिमका सदस्यलाई म्याच फिक्सिङको प्रस्ताव आएको बताएका थिए ।

क्रिकेट कमेन्टेटर सचिन तिमल्सेनाले स्पट फिक्सिङ गराउने क्रियाकलाप देखेकाे दाबी गर्दै लिगबाट अलग भएको घाेषणा गरेका छन् । यसबारे सत्यतथ्य छानबिन गर्न गृह मन्त्रालयले प्रहरीलाई निर्देशन समेत दिइसकेकाे छ ।