५ पटककाे विजेता समूह चरणबाटै बाहिर, अफगानिस्तान र बंगलादेश सेमिफाइनलमा !

काठमाडौं, २ असोज । बंगलादेश र अफगानिस्तान एसिया कप क्रिकेट प्रतियोगिताको सेमिफाइनलमा प्रवेश गरेका छन् । भने ५ पटककाे विजेता श्रीलंका समूह चरणबाटै बाहिरिएकाे छ । युएईको अबुधाबीस्थित शिख जायद रंगशालामा सोमबार राति सम्पन्न खेलमा अफगानिस्तानसँग ९१ रनले पराजित भएपछि श्रीलंका एसिया कपबाट बाहिरिएको हो । २५० रनको चुनौति पछ्याउँदै ब्याटिङ गरेको श्रीलंकाले ४१.२ ओभरमा सबै विकेटको क्षतिमा १५८ रन बनाएसँगै अफगानिस्तानले ९१ रनले विजयी भएको हो । विना रन पहिलो विकेट गुमाएको श्रीलंकाले कुनै जादु देखाउन सकेन ।

श्रीलंकाका लागि उपुल थरांगाले ३६, थिसरा परेराले २८, धनन्जय डे शिल्भाले २३ र कप्तान एन्जेलो मथेवसले २२ रन बनाउन बाहेक अन्य खेलाडी पनि सस्तैमा समेटिए । श्रीलंकालाई सस्तैमा समेट्ने क्रममा राशिद खान, मुजिब उर रहमान, गुल्बादिन नाइब र मोहम्मद नाबीले समान २-२ विकेट लिए । यसअघि टस जितेर पहिले ब्याटिङ गरेको अफगानिस्तानले निर्धारित ५० ओभरमा सबै विकेट गुमाएर २४९ रन बनाएको थियो । अफगानिस्तानको लागि रहमत शाहले उत्कृष्ट इनिङ्स खेले । उनले ७२ रन बनाएका थिए । त्यस्तै, इन्सानुल्लाहले ४५, हस्मातुल्लाह शाहिदीले ३७ र मोहम्मद शाहजादले ३४ रनको योगदान दिए ।

बलिङतर्फ श्रीलंकाका थिसरा परेराले ५ विकेट लिए । उत्कृष्ट बलिङ गरेका परेराले ९ ओभर बलिङ गर्दै ५५ रन खर्चेर ५ विकेट लिएका थिए । पराजित श्रीलंका समूह चरणको दुबै खेलमा हार ब्यहोर्दै एसिया कपबाट बाहिरिएको हो । यसअघि आफ्नो पहिलो खेलमा बंगलादेशसँग १३७ रनले पराजित भएको थियो । समूह बी को अन्तिममा बंगलादेश र अफगानिस्तानबीचको खेल बिहिबार  हुनेछ ।