६ घण्टा १ मिनेटमा सगरमाथा पुगे मिङ्मा, बन्यो नयाँ कीर्तिमान

आरोही मिङ्मा दोर्ची शेर्पाले सबैभन्दा कम समयमा सगरमाथाको सफल आरोहण गरेर कीर्तिमान रचेका छन् । संखुवासभाका शेर्पाले जेठ १३ गते ६ घण्टा १ मिनेटमा विश्वको सर्वोच्च शिखर सगरमाथाको सफल आरोहण गरी कीर्तिमान कायम गरेका हुन् । मंगलबार काठमाडौँमा पत्रकार सम्मेलन गरी पायोनियर एड्भेन्चरले शेर्पाले सगरमाथा र चौथो ल्होत्से हिमालको पनि सबैभन्दा छोटो समयमा सफल आरोहण गरेर नयाँ कीर्तिमान कायम गरेको औपचारिक जानकारी गराएको हो ।

यसअघि निर्मल पुर्जाले १० घण्टा १५ मिनेटमा सगरमाथाको आरोहण गरेका थिए ।
पत्रकार सम्मेलनमा शेर्पाले नेपालीको सहयोगमा विदेशीले हिमाल आरोहणको क्षेत्रमा नयाँ–नयाँ कीर्तिमान राखेपछि आफूलाई पनि छोटो समयमै सगरमाथाको आरोहण गरेर नयाँ कीर्तिमान कायम गर्ने इच्छा जागेको बताए ।

संखुवासभाको मकालु गाउँपालिका–२ का शेर्पाले सगरमाथाको पाँचपटक सफल आरोहण गरिसकेका छन् । उनले ल्होत्से हिमालको ३ पटक, मकालुको ३ पटक, मनास्लुको ३ पटक, केटु हिमालको २ पटक, धौलागिरि हिमालको २ र आमादब्लाम हिमालको २ पटक गरी २० पटक हिमालहरुको सफल आरोहण गरिसकेका छन् ।