प्रधानमन्त्री ओलीले नयाँ वर्षको यस्तो दिए शुभकामना

काठमाडौं । प्रधानमन्त्री केपी शर्मा ओलीले आजदेखि सुरु भएको नयाँ वर्ष २०१९ को अवसरमा शुभकामना व्यक्त गरेका छन् । स्वदेश तथा विदेश बस्ने सम्पूर्ण नेपाली दिदीबहिनी तथा दाजुभाइमा हार्दिक शुभकामना व्यक्त गरेका हुन् ।

ग्रेगोरियन क्यालेण्डर र इस्वी सम्वत्को पात्रो अनुसार प्रत्येक वर्षको जनवरी १ तारिखलाई संसारका अधिकांश देशमा नयाँ वर्षका रुपमा मनाइन्छ ।

वैशाख १ लाई नयाँ वर्षका रुपमा मनाउने हाम्रो मौलिक परम्परा भए पनि अन्तर्राष्ट्रिय प्रचलनमा रहेको इस्वी सम्बतलाई पनि हामी नेपालमा अंग्रेजी नयाँ वर्षको रुपमा मनाउने प्रधानमन्त्री ओलीले शुभकामनामा उल्लेख गरेका छन् ।

हामीबाट विदा भएको इ.सं. २०१८, नेपालको सुस्थिर राजनीतिक उपलब्धिको वर्षका रुपमा रहेको उल्लेख छ । जननिर्मित नयाँ संविधान अनुसार निर्वाचनका माध्यमबाट तीनै तहका सरकार गठन भई बितेको वर्ष राजनीतिक संक्रमणकालको अन्त्य भएको उल्लेख छ ।

संक्रमणकालीन संशय चिर्दै ‘समृद्ध नेपाल–सुखी नेपाली’को संकल्प सहित हामी विकास र समृद्धिको महाअभियानमा अभिमुख छौं । हाम्रा लागि वितेको वर्ष नयाँ संविधानको कार्यान्वयन गरी संक्रमणकालको अन्त्य वर्ष बनेको शुभकामना सन्देशमा उल्लेख छ ।

‘अव्यवस्था र अनिश्चयको वर्षाैं लामो अभ्यासबाट पछौटे अवस्थामा रहेको मुलुकलाई विकास र समृद्धिमा लैजानु अवश्य पनि सजिलो काम होइन । तर हामीले मुलुक र जनताको दीर्घकालीन हितमा अगाडि बढाएका पाइला आगामी वर्षमा अझ दृढतापूर्वक उचाईमा पुग्नेछन्’ शुभकामनामा उल्लेख छ ।

‘नेपाली नयाँ वर्षको संघारमा पुग्दासम्म जनताको जीवनसुखी र राष्ट्रको अवस्थासमृद्ध बनाउने हाम्रो अभियान सार्थक विन्दुमा पुग्नेछ । निर्वाचनमार्फत प्रकट जनचाहनालाई शीरमा राख्दै मैले पटक पटकसंकल्प गरेको छु’ प्रधानमन्त्रीले भनेका छन्, ‘जनताका अपेक्षालाई कुनै पनि हालतमा विफल हुन दिने छैन ।’