बालुवाटार बैठक सकिएलगत्तै कांग्रेसका प्रभावशाली नेताले दिए एमालेका लागि खुसीको खबर !

काठमाण्डौ । संसदमा विचाराधीन संविधान संशोधनको प्रस्ताव अघि नबढ्ने संकेत देखिएको छ । मंगलबार प्रधानमन्त्री निवास बालुवाटारमा भएको तीन दलका शीर्ष नेताहरुको बैठकपछि यो संकेत देखिएको हो ।

प्रमुख प्रतिपक्षी दल नेकपा एमालेले अहिले कुनै पनि हालतमा संविधान संशोधन प्रस्ताव अघि बढ्न नसक्ने अडान लिएपछि बैठक विना सहमति टुंगिएको थियो ।

मंगलबारको बैठक लगत्तै सरकारको नेतृत्व गरिरहेको नेपाली कांग्रेसका एक प्रभावशाली नेताले अब संविधान संशोधन प्रस्ताव अघि नबढ्ने कुराको संकेत गरेका हुन् ।

कांग्रेस नेता विमलेन्द्र निधिले तीन दलका शीर्ष नेताहरुको बैठकमा एमालेले लिएका अडान र राखेको नयाँ प्रस्तावका कारण तत्काल संशोधन प्रस्ताव अघि नबढ्ने बताएका छन् ।

बालुवाटार बैठक सकिएको केही घण्टापछि आफ्नो ट्वीट अकाउन्टमा स्टाटस् लेख्दै नेता निधिले भनेका छन्,‘संविधान संशोधनमा एमालेले समर्थन नगर्ने र दुईतिहाई नपुग्ने भएपछि उक्त संशोधन प्रस्ताव हाललाई अगाडि नबढ्ने भो यसबारे आजै राजपासँग बैठक छ ।’

कांग्रेस नेता निधिको यो भनाईसँगै अब संविधान संशोधन प्रस्ताव अघि नबढ्ने निश्चित भएको देखिएको छ । मंगलबारै एमाले र राप्रपाबीच पनि संविधान संशोधनकै विषयमा छलफल भएको थियो ।

सम्भवत कांग्रेस नेता निधिको यो प्रतिक्रियासँगै राप्रपाले पनि संविधान संशोधनको पक्षमा नउभिने सम्भवनाको संकेत देखिदै गएको छ । यद्यपि, राप्रपाले भने संविधान संशोधनको पक्ष–विपक्षमा निर्णय गरिसकेको छैन ।  कांग्रेस नेता निधिको यो प्रतिक्रियासँगै एमालेले राखेको अडान सफल हुने संकेत देखिएको छ ।