आस्थाभन्दा माथि उठेर जिल्लाको विकासमा लाग्न दाङका सांसदहरुलाई सभामुखको आग्रह
सारांश
- काठमाडौं, २२ चैत ।
- सभामुख कृष्णबहादुर महराले दाङबाट प्रतिनिधिसभा र राष्ट्रियसभामा प्रतिनिधित्व गर्ने सबै जनप्रतिनिधिहरुसँग सामूहिक भेटवार्ता गरेका छन् ।
- आज बिहीबार दिउँसो सभामुख निवास बालुवाटारमा दाङका जनप्रतिनिधिहरुसँग भेटवार्ता गरेका हुन् ।
काठमाडौं, २२ चैत । सभामुख कृष्णबहादुर महराले दाङबाट प्रतिनिधिसभा र राष्ट्रियसभामा प्रतिनिधित्व गर्ने सबै जनप्रतिनिधिहरुसँग सामूहिक भेटवार्ता गरेका छन् । आज बिहीबार दिउँसो सभामुख निवास बालुवाटारमा दाङका जनप्रतिनिधिहरुसँग भेटवार्ता गरेका हुन् ।
भेटमा सभामुख महराले दाङको समग्र विकासका लागि राजनीतिक दलभन्दा माथि उठेर एकताबद्ध हुन आग्रह गरे । “राजनीतिक आस्था र विचार आ–आफ्नो ठाउँमा छ । दाङको विकासका लागि सबै एकै ठाउँमा आउनैपर्छ”, सभामुख महराले भने, “विकास र समृद्धिलाई पार्टी र विचारले रोक्दैन, रोक्नु पनि हुँदैन ।”
दाङको विकासका लागि सबै जनप्रतिनिधिहरु एक ठाउँमा आएर बृहत योजना बनाउनुपर्ने आवश्यकता रहेको औंल्याए । दाङको मुख्य समस्याका रुपमा रहेको खानेपानी र सिचाइका लागि दीर्घकालीन र अल्पकालीन योजना निर्माण गरी लाग्नुपर्ने उनको भनाई थियो ।
“दाङमा खानेपानी र सिचाइको समस्या समाधानका लागि नदी डाइभर्सन, ४÷५ वटा हाइड्याम र अन्य स–साना आयोजनाहरु अघि बढाउनै पर्छ”, सभामुख महराले भने, “त्यस्तै, टरिगाउँ एयरपोर्टको स्तरोन्नति, इन्धन डिपोको स्थापना, नारायणपुरमा अन्तर्राष्ट्रिय विमानस्थलको सम्भाव्यता अध्ययनलगायतका बृहत योजनाहरु सबैको दिमागमा बस्न जरुरी छ ।”
सभामुख महराले कोइलाबास नाका सञ्चालन गर्न सके दाङ देउखुरीको कायापलट नै हुन सक्ने बताए । उनले दाङलाई लुम्बिनी र मानसरोवरसँग जोड्ने गरी सडक सञ्जाल बिस्तार गर्ने अनि स्वर्गद्वारीलाई ऐतिहासिक धार्मिक पर्यटनको केन्द्रका रुपमा जोड्न सके दाङमा चीन र भारतका पर्यटकहरुलाई भित्रायाउन सकिने बताए ।
केही समयअघि मात्रै आफू दाङको भारतीय सीमा क्षेत्रका बस्तीहरुमा पुगेको स्मरण गर्दै महराले दाङका २२ वटा सीमा नाकाहरुको समस्या समाधान गर्न सबैको विशेष ध्यान जानुपर्नेमा जोड दिए । नाका क्षेत्रमा जान आफू ३ घण्टा भारतीय भूमिबाट गुज्रिनुपरेको भन्दै सभामुख महराले सीमा नाकाहरुलाई सडक सञ्जालले जोड्ने र सञ्चार र खानेपानीको समस्या समाधानका लागि सबैले गम्भीर भएर सोच्न आग्रह गरे ।
भेटघाटका अवसरमा दाङका सांसदहरुले जिल्लाको समग्र विकासका लागि आफूहरुले जे सकिन्छ, काम गर्न तयार रहेको बताएका थिए । सभामुखले सामूहिकरुपमा बोलाएर जिल्लाको विकासमा चासो देखाएकोमा खुसी व्यक्त गर्दै यस्तो बसाइको निरन्तरताका लागि अनुरोध समेत गरेका थिए । उनीहरुले जिल्लामा देखिएका विकास निर्माणका आवश्यक योजनाहरु, अल्पकालीन र दीर्घकालीन रुपमा गर्न सकिने काम, प्रदेशको राजधानी, अस्पताललगायतका विषयमा पनि सभामुखको ध्यानाकर्षण गराएका थिए ।
भेटमा दाङबाट प्रतिनिधित्व गर्ने प्रतिनिधिसभा सदस्यहरु मेटमणि चौधरी, रेखा शर्मा, शान्ता चौधरी, हिराचन्द्र केसी, पार्वती डिसी चौधरी, गंगा चौधरी, विमला नेपाली र राष्ट्रियसभा सदस्यहरु अनिता देवकोटा र कोमल वली सहभागी थिए ।
प्रतिक्रिया