चुनावको समिक्षा गरिरहेको माओवादीलाई एमाले अध्यक्ष ओलीले राखे एक्कासि नयाँ प्रस्ताव

भक्तपुर । नेकपा एमालेका अध्यक्ष केपी ओलीले २०७४ साल एमालेमय हुने बताएका छन् । मंगलबार वैदेशिक रोजगार व्यावसायी संघको नवनिर्वाचित कार्यसमितिका पदाधिकारीहरुलाई बालकोटस्थित आफ्नै निवासमा बधाई तथा शुभकामना दिँदै अध्यक्ष ओलीले सो कुराको घोषणा गरेका हुन् ।

अध्यक्ष ओलीले चुनावमा जित हासिल गर्ने रहर भए माओवादीले अब एमालेसँग सहकार्य गरेर जान समेत आह्वान गरे ।  उनले कांग्रेससँग सति गएर माओवादीले कहिल्यै चुनाव जित्न नसक्ने बताउँदै एमालेसँग सहकार्यमा आउन आह्वान गरे ।

अध्यक्ष ओलीले भने, ‘अब नेपाली कांग्रेससँग सति गएर चुनाव जित्न सकिन्न्, माओवादी साथीहरुले एमालेसँग सहकार्य गर्नुपर्छ । अब नेपालमा लोकतन्त्रको नेतृत्व बामपन्थी आन्दोलनले मात्र गर्न सक्छ ।’

ओलीले भने, ‘म एक(दुई दिनमै माओवादीका नेता साथीहरुलाई भन्नेवाला छु, आजको यथार्थ र भोलिको सम्भावना बताउनेवाला छु । सति गएर चुनाव जितिन्न ।

चुनाव जित्नुपर्छ भने एमालेसँग सहकार्य गर्नुस् भन्नेवावला छु साथीहरुलाई ।’ अध्यक्ष ओलीको यो आह्वानले एमालेले माओवादीलाई स्पेस दिन खोजेको नयाँ संकेत समेत दिन खाजेको देखिन्छ ।

ओली निवास बालकोट पुगेको नवनिर्वाचित वैदेशिक रोजगार व्यावसायी संघका पदाधिकारीहरुले एमाले–माओवादी गठबन्धनका कारण चुनाव जितेका थिए ।