मनोज गजुरेलले आपसी सहमतिमा श्रीमतीसँग गरे सम्बन्ध बिच्छेद !

काठमाडौं, माघ ५ । ‘कमेडी किङ’ नामले परिचित मनोज गजुरेलले आपसी सहमतिमा श्रीमतीसँग सम्बन्ध बिच्छेद गरेका छन् । गजुरेलले श्रीमती मिना ढकालसँग आपसी सहमतिमा नै सम्बन्ध बिच्छेद गरेको शिखरन्यूजलाई जानकारी दिए ।

सम्बन्ध बिच्छेदको सम्बन्धमा गजुरेलले भने, ‘आपसी सहमतिमै हाम्रो असन्तुष्टिलाई अलगअलग बस्नेगरी टुंगो लगाएका छौँ ।’ भक्तपुर अदालतबाटै कानुनी प्रक्रिया पूरा गरेर अलग बस्न थालेको गजुरेलले शिखरन्यूजलाई बताए ।

‘छोरा मसँग छ । छोरी मीनासँग’, गजुरेलले भने, ‘किन अलग भयौँ भन्नु भन्दा पनि असन्तुष्टिको समाधान त्यही निस्कियो त्यही भयो ।’

आपसी सहमतिमै सम्बन्ध बिच्छेद भएको बताएका गजुरेलले मिडियामा धेरै कुरा नगर्ने बताए । सम्बन्ध बिच्छेदपछि गजुरेल बालकोटस्थित घरमा छोरासँग छन् भने मीना नयाँ बानेश्वरमा छोरीसँग बस्न थालेकी छिन् ।

यसरी सम्बन्धमा परेका थिए ?

०५२ सालमा पहिलो पटक भेट भएपछि मनोज र मीना प्रेममा परेका थिए । यो जोडीको विवाह २०५३ साल वैशाखमा काठमाडौंकै एक मन्दिरमा भएको थियो । मीनाका अनुसार विवाहमा गजुरेल २२ वर्षका थिए भने उनी १९ वर्षकी थिइन् ।

२०५३ सालमा प्रेम विवाह गरेको यो जोडीले २०७४ पुस ११ गते सम्बन्ध बिच्छेद गरेका छन् । यति छोटो समयमा नै यो जोडीको सम्बन्ध बिच्छेदको खबरले गजुरेलका फ्यान आश्चर्यमा परेका छन् भने मीनाका आफन्तसमेत चकित परेका छन् ।