गच्छदारले यसरी जिल्याए कमल थापालाई, राप्रपामा हंगामा

काठमाडौं, १३ माघ । प्रदेश र प्रतिनिधिसभा सदस्य निर्वाचन सकिएलगत्तै काम चलाउ बनेको प्रधानमन्त्री शेरबहादुर देउवा नेतृत्वको सरकारले पछिल्लो समय लोकप्रिय बन्न बिभिन्न निर्णय गर्न थालेको छ । मन्त्रीहरुले जिल्लाको राजनीतिमा आफू लोकप्रिय बन्न मन्त्री परिषद्मा प्रस्ताव लैजाने होडबाजी नै चलेको छ ।

चुनाव लगत्तै राप्रपाको केन्द्रीय समितिमा उठेको जेष्ठ नागरिक भत्ताको उमेर ७० बाट घटाएर ६५ बर्ष पुर्याउने प्रस्तावलाई उपप्रधान तथा उर्जामन्त्री कमल थापाले समयमै अघि बढाउन नसक्दा त्यसको ‘जस’ नेपाली कांग्रेस र उपप्रधान तथा स्थानीय विकासमन्त्री विजय गच्छदारले लिएका छन् ।

राप्रपा केन्द्रीय समितिको बैठकमा हेमानन्दन गिरिले जेष्ठ नागरिक भत्ता दिइने उमेर ७० बाट घटाएर ६५ मा झार्नुपर्ने प्रस्ताव राखेकी थिइन् । राप्रपाको केन्द्रीय समितिमा उठेको सो प्रस्ताव थापाले मन्त्री परिषदमा उठाएनन् ।

राप्रपा केन्द्रीय समितिको बैठक बसेको दुई महिनापछि उपप्रधान तथा स्थानीय विकासमन्त्री समेत रहेका कांग्रेस नेता गच्छदारले लगेर पारित समेत गराएपछि राप्रपाका नेता–कार्यकर्ताहरु पछुतो मानिरहेका छन् । राप्रपाको केन्द्रीय समितिमा उठेको सो प्रस्ताव मन्त्रीपरिषदमा गच्छदारले लगेका हुन् ।

केही समयअघि उद्योगमन्त्री सुनिलबहादुर थापाले २०३६ सालमा छिन्ताङ्गमा मारिएका १६ जनालाई शहीद घोषणा गर्नुपर्ने प्रस्ताव मन्त्री परिषद्मा लगेर एकाएक चर्चामा आए । गृहमन्त्रीबाट मन्त्रीपषिदमा लैजानु पर्ने प्रस्ताव उद्योगमन्त्री थापाले लगेका हुन् ।

प्रदेश र प्रतिनिधिसभा सदस्य निर्वाचनबाट पराजित बनेको राप्रपाकालागि अर्को निर्वाचनकालागि जनमत बटुल्ने गतिलो उपाय गुमाएकोमा अध्यक्ष कमल थापालाई नेता–कार्यकताले धिक्कारिहेका छन् । राप्रपाको प्रस्ताव ‘कपि’ गरेर गच्छदार लोकप्रिय बन्न लागेको राप्रपाका एक केन्द्रीय सदस्यले बताए । उनका अनुसार यतिबेला राप्रपाका अध्यक्ष थापादेखि केन्द्रीय समितिमा समेत पछुताउनेको संख्या अधिक छ ।