शेरधन राईमाथि ‘काउन्टर अट्याक’: मुख्यमन्त्रीमा नेता आचार्यको दाबी

काठमाडौं, १३ माघ । प्रदेश नम्बर १ मा एमालेका तर्फबाट दुईजना ‘हेभिवेट’ नेता मुख्यमन्त्रीका प्रमुख दावेदार हुन् । एमाले सचिव भीम आचार्य र पोलिटब्युरो सदस्य शेरधन राई दुवैजनाबीच मुख्यमन्त्री को हुने भन्ने विषयमा रस्साकस्सी छ ।

एमालेका पोलिटब्यूरो सदस्य शेरधन राईले प्रदेश १ को मुख्यमन्त्री आफू बन्ने भन्दै सार्वजानिक अभिव्यक्ति दिँदै आएका छन् । तर, राईको अभिव्यक्तिमाथि एमाले नेता भीम आचार्यले ‘काउन्टर अट्याक’ गरेका छन् ।

वाम गठबन्धनबाट एमालेको भागमा परेको प्रदेश १ को मुख्यमन्त्रीमा नेता राईको चर्चा चलिरहेका बेला आचार्यले उम्मेदवारी दिने बताएका हुन् ।

काठमाडौंमा आज एक बेग्लै पत्रकार भेटघाट गरी आचार्यले आफू मुख्यमन्त्री बन्नेमा समेत ढुम्म रहेको बताए । निर्वाचनको टिकट वितरणमा जोडेर आफूलाई लाञ्छित गरिए पनि त्यसमा सत्यता नभएको दाबी गरे ।

भीम आचार्य एमाले १ नम्बर प्रदेशका संयोजक हुन् । यसपटक उनी सुनसरी–१ ‘ख’ बाट २० हजार २११ मतका साथ विजयी भए । यस्तै एमाले १ नम्बर प्रदेशका सहसंयोजक राई २० हजार ३३४ मतका साथ भोजपुर ‘ख’ बाट विजयी भए ।