ड्याट्सन रेडी गो, क्विड र इयोन कार कम्पनीद्वारा फिर्ता गरिने

एजेन्सी – भारतीय बजारमा प्रतिष्ठित तीन कम्पनीले आफ्ना इन्ट्री लेभलका केही कारलाई परीक्षणका लागि कम्पनीमा फिर्ता बोलाएका अर्थात रिकल गरेका छन् । ड्याटसनको रेडी गो, रेनल्टको क्विड र हुन्डाईको इयोनका केही कार यसरी रिकल गरिएका हुन् ।

जापनिज कम्पनी निसानले आफ्नो भारतमा निर्मित ९ सय ३२ ड्याटसन रेडी गो कार फिर्ता लिने घोषणा गरेको छ । कम्पनीले यी कारमा भएका खराब इन्धन सिस्टमलाई ठीक गर्नका लागि यसरी फिर्ता लिने कुरा जनाएको छ ।

यी कारमा भएको फ्युल होज जाँच गरेर त्यसमा क्लिप लगाइने छ । ड्याटसनका गत मई १८ सम्म निर्माण गरिएका यी रेडी गो कार फिर्ता लिइने बताइएको छ ।

फ्रान्सेली कार निर्माता कम्पनी रेनल्टले पनि करिब ५० हजार क्विड कार फिर्ता लिने बताएको छ । यी कारको इन्धन प्रणालीमा सुधार गरिने छ । यी कारमा पनि होज क्लिप लगाइने छ । सन् २०१५ को अक्टोबर देखि यही मई १८ सम्म निर्मित ८ सय सिसीका यी क्विड कारको जाँच गरेर आवश्यक सुधार गरिने रेनल्ट इन्डियाले जानकारी दिएको छ ।

हुन्डाईले आफ्नो ७ हजार ६ सय ५७ इयोन कारलाई बजारबाट फिर्ता बोलाएको छ । यी कारमा भएका क्लच र ब्याट्री केबुलमा भएको गडबडीका कारण यी कार फिर्ता बोलाइएको बताएको छ । सन् २०१५ को जनवरीमा निर्मित यी कार फिर्ता बजारबाट फिर्ता लिने बताइएको छ ।

यी सबै कार्य कम्पनीहरुले निःशुल्क गरिदिने छन् ।

किन गरिन्छ रिकल ?
बजारबाट यसरी गाडी फिर्ता लिने कार्य नौलो होइन । पहिले पनि धेरै कम्पनीहरुले यसरी आफ्ना गाडी फिर्ता लिएर फेरि ग्राहकलाई उपलब्ध गराएका धेरै घटना छन् । यसलाई सामान्य प्रक्रिया मानिन्छ र यसले कम्पनीको विश्वसनियतामा अझै वृद्धि गराउछ । कुनै कमी भएमा त्यसलाई सच्याएको रुपमा यसलाई लिइन्छ । सम्भावित दुर्घटना र त्यसबाट हुन जाने जनधनको क्षतिलाई रोक्नका लागि यस्तो उपाय अबलम्वन गरिन्छ । यस प्रकारको निर्णय कम्पनीहरुले सार्वजनिक सूचना नै निकालेर सार्वजनिक गर्छन् । सामान्य त्रुटिको पहिचान हुनासाथ निर्माता कम्पनीले तत्कालै आफ्ना सवारीसाधन रिकल गर्ने परम्परा नै हो । त्यस अनुसार सामान्य समस्या देखिएको पार्टपुर्जा फेर्नेदेखि गाडी नै साटिदिने वा पैसा फर्काउनेसम्म पनि हुन्छ ।

भारतीय दैनिक पत्रिका द इकोनोमिक टाइम्सका अनुसार सन् २०१२ यता भारतमा मात्र साढे आठ लाख गाडी रिकलमा परिसकेका छन् । गत वैशाख–जेठ महिनामा मात्र भारतीय कार उत्पादकहरूले विभिन्न कारण देखाउँदै डेढ लाख सवारीसाधन बजारबाट फिर्ता लैजाने निर्णय गरिसकेका छन् ।

सन् २०१६ भित्र मात्रै होन्डाका ५७ हजार ६ सय ७६, मारुती सुजुकीका ९७ हजार ७ सय ४६, फोर्डका ८८ हजार ७ सय र भक्सवागनका ३ हजार ८ सय ७७ कार तथा जिप रिकलमा परेका छन् । आफ्ना उत्पादनमा समस्या देखिए युरोप र अमेरिकामा पनि लामो समयदेखि रिकलको अभ्यास छ ।

एउटै सेगमेन्टका प्रतिस्पर्धि कार
ड्याटसन रेडी गो, रेनल्ट क्विड र हुन्डाई इयोन एउटै सेगमेन्ट अर्थात इन्ट्री लेभलका प्रतिस्पर्धि कार हुन् । नेपालमा पनि यी तीन कारका बीचमा प्रतिस्पर्धा छ । हुन्डाईको इयोन पहिले देखि नै नेपाली बजारमा उपलब्ध छ भने रेडी गो र क्विड नेपालमा भित्रिएको केही महिना मात्र भएको छ ।

नेपालमा कुनै समस्या छैन
नेपालमा जुलाईमा निर्मित रेडी गो कार भित्रिएकाले कुनै समस्या नभएको ड्याटसनको नेपालका लागि आधिकारिक बितरक पायोनियर मोटोकर्पका सिनियर म्यानेजर ज्ञानेन्द्र चन्दले बताए । हुन्डाईले पनि जनवरीमा भारतीय बजारकै लागि मात्र निर्मित केही कारमा मात्र त्यो समस्या देखिएको र नेपाली बजारमा ती कार उपलब्ध नभएकाले कुनै समस्या नहुने बताएको छ । हुन्डाईको नेपालका लागि आधिकारिक बितरक लक्ष्मी इन्टरकन्टिनेन्टलका एजीएम–सर्भिस दीपक थपलियाले यो खासै ठूलो समस्या नभए पनि परीक्षणका लागि मात्र भारतीय बजारमा उपलब्ध त्यो समयमा निर्मित गाडी परीक्षणका लागि बोलाइएको बताए । रेनल्टको नेपालका लागि आधिकारिक बितरक एड्भान्स्ड अटोमोबाइल्सले पनि आफूहरुलाई यस वारेमा आधिकारिक जानकारी नआएको बताएको छ ।