कसले बाहिर ल्यायो पाइलट र एअर ट्राफिक कन्ट्रोलरबीचको संवाद? ६ जना कर्मचारी सरुवा

काठमाडौं, ३० फागुन- दुर्घटनामा परेको यूएस बाङ्ला एयरवेजका चालक र एअर ट्राफिक कन्ट्रोलरबीचको संवाद सार्वजनिक भएकोमा नागरिक उड्डयन प्राधिकरण र नेपाल प्रहरीको केन्द्रीय अनुसन्धान ब्यूरोले अनुसन्धान गर्ने भएका छन् ।

त्रिभूवन अन्तराष्ट्रिय विमानस्थलले मंगलबार गरेको पत्रकार सम्मेलनमा नागरिक उड्डयन प्राधिकरणका महानिर्देशक सञ्जीव गौतमले अन्तराष्ट्रिय नागरिक उड्डयन संगठन (आइकाओ) को नियम अनुसार पनि विमानको ब्ल्याक बक्स, एटीसीसँगको सम्वाद र उड्डयनसम्बन्धी आँकडा सार्वजनिक गर्न नमिल्ने भएकाले छानविन गर्न लागिएको जानकारी दिए । गौतमले भने, ‘ककपिट र एटीसीबीचको संवाद कसले उपलब्ध गरायो र कसले किन सार्वजनिक गरे, सबै कुरा छानविन हुन्छ ।’ यसैबीच नागरिक उड्डयन कार्यालयले सोमवार यूएस बाङ्ला एअरवेज विमान दुर्घटना हुँदा ट्रफिक कन्ट्रोल कक्षमा रहेका ६ जना कर्मचारीलाई ‘ड्यूटी अफ’ गरेको छ ।

त्रिभूवन अन्तराष्ट्रिय विमानस्थलमा भएको यो दुर्घटना पछि आपतकालिन सेवा ३ मिनेट भित्रै पुग्नुपर्ने अन्तर्राष्ट्रिय मान्यता रहेपनि त्यसभन्दा चाँडै २ मिनेट भित्रै उद्दार टोली पुगेको अधिकारीहरुले दावी गरे । ‘विमानमा लागेको आगोले विमानस्थलको घाँसे क्षेत्रमा डढेलो लागेकाले आगो नियन्त्रण गर्न अलि कठिनाई भएको हो । दमकल लगायत उद्दार टोली समयमै पुगेको हो ।’ महानिर्देशक गौतमले भने ।

ढाकाबाट काठमाडौं आएको यूएस बाङ्ला एयरवेजको विमान दुर्घटनामा चालक दलका चारै जना सदस्यसहित ४९ जनाको मृत्यु भएको छ भने २१ जना घाइते भएका छन् । घाइतेमध्ये थोरैको मात्र अवस्था गंभिर छ । उनीहरुको काठमाडौका विभिन्न अस्पतालमा उपचार भइरहेको छ । मृतकहरुको शव आफन्तलाई बुझाउन केही समय लाग्ने अधिकारीहरुले बताएका छन् । शवको पहिचान हुन समय लाग्ने र डिएनए परीक्षणपछि मृतकको शव आफन्तलाई बुझाइनेछ । आजको नागरिक दैनिकमा खबर छ ।