पक्राउ परेका पूर्वमन्त्री विश्वकर्मालाई ५ दिनको म्याद थप

काठमाडौँ । महानगरीय प्रहरी परिसर काठमाडौँले नेकपा विप्लव समुहका केन्द्रीय प्रवक्ता एवं पूर्वमन्त्री खड्गबहादुर विश्वकर्मा (प्रकाण्ड)सहित पक्राउ परेका तीन जनालाई ५ दिन म्याद थपेको छ ।

प्रहरी टोलीले मकवानपुरको हेटौँडाबाट काठमाडौँ आउँदै गरेको बा१४प २७२९नं को सवारी साधन चेकजाँचका क्रममा पक्राउ गरेको थियो । पक्राउ पर्नेमा कालीकोटका प्रकाण्डसहित कपिलवस्तुका मनबहादुर श्रेष्ठ र कालीकोटकै हरिचन्द्र आचार्यलाई मंगलबार पक्राउ गरेको थियो ।

पक्राउ परेकालाई चन्दा ऐन, २०३० बमोजिम मुद्दा दर्ता गरी काठमाडौँ जिल्ला अदालतबाट ५ दिनको म्याद थप गरी अनुसन्धान भइरहेको प्रहरीले जनाएको छ ।

महानगरीय प्रहरी परिसर काठमाडौँका प्रवक्ता मोहनकुमार थापाले विभिन्न उद्योगपति, व्यवसायीसँग अवैध रुपमा ७ करोडभन्दा बढी चन्दा असुल गरेको भन्दै पक्राउ गरिएको बताएका छन् ।