सामाजिक परिचालकहरुले प्रदेश नं २को मुख्यमन्त्रीको कार्यालय घेराउ

जनकपुर ४ भदौ । असारदेखि कामबाट निकालिएका सामाजिक परिचालकहरुले आफुहरु लाई सरकारले पूर्ण सेवा सुविधा उपलब्ध गराई तत्काललाई कार्यालय सहायकमा म्याद थप गरी निरन्तरता दिनुपर्ने र योग्यताका आधारमा उमेर हद नलाग्ने गरी दरबन्दी सिर्जना गरी स्थानीय तह कर्मचारीमा समायोजन गर्नुपर्ने सहितको दुईबुँदे माग राख्दै सामाजिक परिचालकहरु आन्दोलनमा उत्रेका छन् ।   उनीहरुले  आज दुई घण्टा मुख्यमन्त्री लालबाबु राउतको कार्यालय घेराउ गरेका हुन् ।

उनीहरुले जनकपुरको पिडारीचोकबाट जुलुस प्रदर्शन गर्दै प्रदेश नं २ सरकारको कार्यालयअगाडि मूलगेटमै पुगेर दुई घण्टा घेराउ गरेका थिए ।  असारमा कामबाट निकालिएका प्रदेश २ का ८५४ सामाजिक परिचालक पुनःबहालीको माग गर्दै साउन २७ गतेदेखि आन्दोनल गर्नुपरेको  बताए ।

संघले जनकपुरमा पत्रकार सम्मेलनको आयोजना गरी पाँच दिनभित्र माग सम्बोधन नभए कडा संघर्षमा ओर्लने संघका अध्यक्ष शिवशंकर मेहताले बताए । आफूहरु कडा परिश्रमका साथ नौ वर्षसम्म जनताको सेवा गरे पनि स्थानीय सरकार आएपछि बेरोजगार हुनु परेको जनकपुर उपमहानगरपालिका वडा नम्बर १४ मा सामाजिक परिचालकको रुपमा काम गरेकी रेणु दासले दुःखेसो पोखिन् ।