सर्लाहीमा बस दुर्घटना हुँदा दुईजनाको मृत्यु, २३ जना घाइते

काठमाडौं, ३० भदौ । सर्लाही जिल्लाको ब्रहम्पुरी गाउँपालिका–२ मा बस दुर्घटना हुदाँ २ जनाको मृत्यु भएको छ । सो घटनामा परी २३ जना घाइते भएका छन् ।

दुर्घटनामा परी मृत्यु हुनेहरुमा ईश्वरपुर नगरपालिका ९ का २६ वर्षीय नथुनी राय यादव र सोही ठाउँकी १९ वर्षीया अन्जु साह रहेको जिल्ला प्रहरी कार्यालय सर्लाहीले जनाएको छ । यादव र साहको घटनास्थलमै मृत्यु भएको प्रहरीले जनाएको छ ।

मलंगवाबाट ईश्वरपुर जाँदै गरेको ना २ ख ८००३ नम्बरको बस ब्रहम्पुरी २ महादेव पोखरी नजिक अनियन्त्रित भई पल्टिएको प्रहरीले जनाएको छ । बसको पट्टा भाँचिएर दुर्घटना भएको हो । पट्टा भाँचिदा यात्रुले बस रोक्न भन्दा चालकले बस नरोकेपछि दुर्घटना भएको घाइते भएका मनोज साहले बताए ।

मृतकको शव अहिले सर्लाही अस्पताल मलंगवामा राखिएको छ । केही घाइतेको उपचार सर्लाही अस्पतालमा भइरहेको छ भने केहीको स्थानीय निजी अस्पतालमा उपचार भइरहेको छ ।