#meToo यौन दुर्व्यवहारका आरोपी नाना पाटेकर सहित ४ को नार्को टेष्ट गर्न तनुश्रीको माग

केही समयदेखि जारी #meToo क्याम्पियन बलिउडमा निकै चर्चामा छ । यो क्याम्पियनमा सार्वजनिक भएका विभिन्न नाममध्ये तनुश्री दत्ता र नाना पाटेकरको प्रसंग सबैभन्दा बढि चर्चामा छ । पछिल्लो केही दिनयता निकै चर्चामा रहँदै आएको तनुश्री र नानाको केसमा नयाँ मोड आएको छ । तनुश्रीका वकिलले यौन दुव्र्यवहारको आरोप लागेका नाना सहितका चार आरोपीलाई नार्को टेष्ट र ब्रेन म्यापिंगको माग गरेका छन् । यसका लागि उनले मुम्बईको ओशिवारा प्रहरी स्टेशनमा आवेदन समेत दिइसकेका छन् । वकिलले नाना सहित सामी सिद्दिकी, गणेश आचार्य र राकेश सारंगको नार्को टेष्ट गरेका सत्यता बाहिर निस्कने दावी गरेका हुन् ।

नाना भन्छन् काम गर्दिन
यौन दुर्व्यवहारको आरोप लागे पछि नाना पाटेकरले हाउसफुल ४ बाट आफुलाई अलग गराएका छन् । जबसम्म आफु माथि लागेको आरोप झुटो सावित हुँदैन, त्यतिबेलासम्म फिल्ममा काम नगर्ने नानाले उद्घोष नै गरेका छन् । आफु माथि लागेको आरोपका कारण अरुलाई दुख नहोस भनेर हाउसफुल ४ मा काम नगर्ने घोषणा गरेको नानाकोे भनाई छ । नानालाई यौन दुर्व्यवहारको आरोप लागेसँगै हाउसफुल ४ को छायांकन रद्द गर्नु पर्ने माग अक्षयकुमारले गरेका थिए ।

निर्देशक साजिद खानले पनि छोडे
नानाले भन्दा अगाडि नै निर्देशक साजिद खानले पनि सलोनी चोपडाले लगाएको यौन दुर्व्यवहारका कारण आफै फिल्मबाट अगल हुने घोषणा ट्वीटरबाट गरेका थिए । रितेश देशमुखले पनि अक्षयकुमारलाई साथ दिदै दुर्व्यवहारका आरोपीसँग काम गर्न नसक्ने भन्दै इन्कार गरेका थिए ।

तनुश्रीले गरिन एफआइर
यौन दुर्व्यवहारको आरोपमा तनुश्रीे नाना विरुद्ध ओशिवारा थानामा एफआइआर दर्ता गरिसकेकी छिन् । तनुश्रीले नाना बाहेक कोरियोग्राफर गणेश आचार्य, निर्माता सामी सिद्दीकी, निर्देशक राकेश सारंग र महाराष्ट नव निर्माण सेनाका केही कार्यकर्ता विरुद्ध एफआइआर दर्ता गराएकी हुन् । मुम्बई प्रहरीले आरोप लागेका सबैलाई सूचना पठाएर बयानका लागि बोलाउने भएको छ । करिब १० वर्ष पहिला हर्न ओके प्लिजको सेटमा एउटा गीतको छायांकनमा आफु माथि दुर्व्यवहार भएको आरोप तनुश्रीले लगाएकी हुन् ।