अाँखा शिबिरमा २२ जनाको अप्रेशन

बिष्णु कुमार आले ,अर्घाखाँची,१७ मंसिर । अर्घाखाँचीको प्राथमिक स्वास्थ्य केन्द्र ठाडामा एक दिने आखाँ शिबिर  सम्पन्न भएको छ । दुर्गम क्षेत्रका आँखाका बिरामीलाई उपचार तथा अप्रेशन गर्न सजिलो होस भन्ने उदेश्यले नेपाल नेत्र ज्योति संघ र प्राथमिक आँखा उपचार केन्द्र ठाडाद्दारा आयोजित आखाँ शिबिरमा १ सय ३५ जनाले आफ्नो आँखा जाँच गराएका छन् भने शिबिरमा मोतियाबिन्दु लागेका २० जना र आँखामा मासु पलाएका २ जना गरि २२ जनाको अप्रेशन गरिएको छ।

शिबिरमा पाल्पा लाईन्स लाकौल आँखा अस्पताल बाट आउनु भएकी डाक्टर अंजिता  हिराचनले मोतियाबिन्दु लागेका र आखाँमा मासु पलाएका बिरामीको अप्रेशन गर्नु भएको हो । शिबिरमा सितगंगा नगरपालीकाको साविक सिमलपानी, सिद्धारा, जलुके, सुवर्णखाल, जुकेना , सितापुर , ठाडा गाबिसबाट आएका आखाँका बिरामीले सेवा पाएका हुन् । शिबिरमा ४० बर्षदेखी ८५ बर्ष सम्मका बृद्ध बृद्धाहरू सेवा लिन स्वास्थ्य केन्द्र आएकोबताइएकाे छ ।