घट्दो जन्मदर रोक्न जापान सरकारको डिजिटल डेटिङ: एआई एपको माध्यमबाट २६५ जोडीले गरे विवाह

घट्दो जन्मदर र युवाहरूमा हराउँदै गएको विवाहप्रतिको आकर्षणलाई रोक्न जापानको राजधानी टोकियोमा प्रविधिको रोचक प्रयोग सुरु भएको छ। टोकियो महानगर सरकारले घट्दो जनसङ्ख्याको सङ्कट टार्न सन् २०२४ को सेप्टेम्बरदेखि ‘टोकियो एनमुसुबी’ नामक कृत्रिम बौद्धिकता (एआई) मा आधारित डेटिङ एप सञ्चालनमा ल्याएको हो।

विवाह गर्न चाहेर पनि उपयुक्त जीवनसाथी भेट्न नसकेका  नागरिकलाई लक्षित गरी सुरु गरिएको यो प्रविधिले हालसम्म २६५ जोडीलाई वैवाहिक बन्धनमा बाँध्न सफलता पाइसकेको छ। सरकारी सर्वेक्षणका आधारमा सुरु गरिएको यस नवीन प्रयासमा हालसम्म १६ हजारभन्दा बढी आधिकारिक सदस्यहरू दर्ता भइसकेका छन् भने सयौँ जोडीहरू अहिले गम्भीर प्रेम सम्बन्धमा रहेका छन्।

एप प्रयोगकर्ताले आफू अविवाहित रहेको सरकारी प्रमाण पेस गर्नुपर्ने र अनिवार्य अनलाइन अन्तर्वार्ता उत्तीर्ण गर्नुपर्ने व्यवस्था मिलाइएको छ। एआईले स्वभाव र रुचि मापन गरी उच्च अनुकूलता भएका जोडीहरू सिफारिस गर्ने हुँदा प्रयोगकर्तालाई निर्णय लिन सहज बनेको छ।

स्वास्थ्य मन्त्रालयको हालैको तथ्याङ्कअनुसार जापानमा वार्षिक जन्मदर लगातार दशौँ वर्ष घटेर साढे छ लाखको हाराहारीमा झरेको छ भने मृत्युदर उच्च गतिमा बढिरहेको छ।

४० वर्षको उमेरमा जीवनसाथी भेटाएका प्रयोगकर्ताहरूले यसलाई अन्तिम अवसर रूपमा स्मरण गरेका छन्।