ठगीको आरोपमा पूर्व राष्ट्रिय फुटबल खेलाडी शाही पक्राउ ।

काठमाडौं, असार ८ – प्रहरीले पूर्व राष्ट्रिय फुटबल खेलाडी लोकबहादुर शाहीलाई पक्राउ गरेको छ । महानगरीय अपराध महाशाखाको टोलीले शाहीलाई बिहीबार टोखाबाट पक्राउ गरेको हो ।  शाहीले क्यानडा पठाइदिन्छु भन्दै युवालाई ठगी गरेको उजुरी परेपछि अनुसन्धानका लागि पक्राउ गरीएको महाशाखाका प्रमुख, वरिष्ठ प्रहरी उपरीक्षक दिनेश अमात्यले जानकारी दिनुभयो ।  उहाँले भन्नुभयो– क्यानडा पठाइदिन्छु भन्दै उनले २५/३० जना युवाबाट दुई लाख ५० हजार रुपैयाँका दरले लिएको रसिद फेला परेको छ । रसिद दिएको भन्दा पनि बढी पैसा लिएको पीडित युवाले बताएका छन् ।   क्यानडा पठाइदिन्छु भन्दै रकम उठाए पनि लामो समयसम्म नपठाएपछि पीडित युवाले प्रहरीमा उजुरी गरेका थिए । शाही अखिल नेपाल फुटबल संघका पूर्व महासचिव तथा पूर्व राष्ट्रिय गोलकिपर हुन् ।