सात वटा बिषयको परीक्षा सकिएपछि बल्ल पुग्यो प्रश्नपत्र

असार २८, २०७४ डोल्पामा स्नातक तह दोस्रो वर्षको प्रश्नपत्र ७ वटा विषयको परीक्षा सकिए पछि बल्ल पुगेका छन् । स्नातक तह दोस्रो वर्षको परीक्षाका लागि त्रिभुवन विश्वविद्यालय परीक्षा नियन्त्रण कार्यालयबाट पठाइएका प्रश्नपत्र आइनपुग्दा गत २३ गते र २६ गतेका ७ वटा विषयको परीक्षा इमेलबाट प्रश्नपत्र तानेर गराइएको डोल्पो क्याम्पस डोल्पाका प्रमुख धनञ्जय सुवेदीले बताउनुभयो ।

आज भएका ४ वटा विषयको परीक्षा भने त्रिभुवन विश्वविद्यालयले पठाएका प्रश्नपत्रबाटै लिइएको छ । भौगोलिक बिकटता र यातायात असुविधाका कारण प्रश्नपत्र पुग्न ढिला भएको जिल्ला शिक्षा कार्यालय डोल्पाले जनाएको छ । कालोपत्रे गर्ने काम सुरु भएपछि जिल्लाको एकमात्र जुफाल विमानस्थल बन्द छ भने डोल्पा राष्ट्रिय राजमार्गसँग जोडिन सकेको छैन ।

प्रश्नपत्र मात्र नभई प्रवेशपत्र र टिप्लिकेट समेत इमेलबाट तानेर प्रिन्ट गरी काम गरिएको परीक्षा केन्द्र समेत रहेको डोल्पो क्याम्पसले जनाएको छ । जिल्लामा दुईवटा क्याम्पसमा स्नातक तहको अध्ययन हुदै आएको छ ।
इकान्तिपुर बाट साभार ।