अछाममा राज्य–आतंकले सीमा नाघ्यो, मतदान अधिकृतले नै दिए डटपेनले धर्का तानेर मतपत्र

अछाम, असार १४- दोस्रो चरणको स्थानीय तह निर्वाचनमा अछाममाकांग्रेस र माओवादी केन्द्रले सत्ताको चरम दुरुपयोग गर्दै राज्य आतंकको नांगो रुपमा देखाएको छ । एमालेलाई मत दिए ज्यानै मार्ने धन्दै मतदातालाई धम्क्याउने, पैसा बाँड्ने, प्रहरी लगाएर मौन अवधिमा प्रचार गर्ने जस्ता कामबाट नअघाएका कांग्रेस–माओवादीले मतदान केन्द्रमै वितण्डा मच्चाएका हुन ।

जनमतबाट निर्वाचन परिणाम आफ्नो पक्षमा नआउने भएपछि कांग्रेस–माओवादीले सरकारी तवरबाट जालसाँजी गरेको प्रमाण फेला परेको छ । मेल्लेख गाउँपालिकाको दुर्गा माध्यामिक मतदान केन्द्रमा लागू गर्न खोजिएको योजनालाई एमालेका कार्यकर्ताले असफल पारेका छन् । कांग्रेस–माओवादीको गठबन्धन हुँदा पनि नजित्ने निश्चित भएपछि एमालेको किल्ला ठानिएको उक्त केन्द्रमा मतपत्रमै डटपेनले धर्का तानेर मतदातालाई दिने काम भएको छ । त्यहाँ मतदान अधिकृत भएर पुगेका अमरबहादुर स्वाँरले तीन दिनअघि नै कांग्रेसका स्थानीय नेताहरुसँग मिलेर त्यस्तो योजना बनाएको तथ्य खुलेको छ । सोही योजनाअनुरा उनले एमाले मतदातालाई मतपत्रमै डटपेनले धर्का लगाएर मतपत्र दिएका हुन ।

‘सय–सयको संख्यामा रहेका मतपत्रका तीनवटा ठेलीमा डट्पेनले कोरिएको भेटियो । ९० प्रतिशत मत एमालेलाई खस्ने अनुमान गरिएको उक्त केन्द्रका ती सबै मत रद्द गराएर कांग्रेस–माओवादीलाई जिताउन सकिन्छ भनेर निर्वाचन अधिकृतले अघिल्लै दिन डट्पेनले आफैँ धर्का लगाएको खुलेको छ,’ स्रोतले भन्यो । पछि एमालेका कार्यकर्ताले निर्वाचन अधिकृत स्वाँरलाई गम्भीर आपत्ति जनाएपछि ती मतपत्र बन्द गरिनुका साथै यसअघि रेखा हालिएकालाई पनि सदर मान्ने मुचुल्का तयार पारिएको छ ।

त्यस्तै साँफे नगरपालिकाको रिडिकोट केन्द्रमा कांग्रेसका जिल्ला सभापति भरतबहादुर स्वाँर र राजाका विरुद्ध जनआन्दोलन चल्दा राजनीति छाडेर फोटोग्राफी गर्छु भन्दै हिँडेका पूर्वराज्यमन्त्री गोविन्दबहादुर शाहको नेतृत्वमा एमाले समर्थकमाथि ज्यादती गरिएको छ । फर्जी मत हाल्न लाग्दा एमालेकी कार्यकर्ता रेखा कुमालले प्रतिवाद गरेपछि उनीमाथि अपशब्द प्रयोग गर्दै नेताका नाम जोडेर बेइज्जत गरिएको छ । तर, एमाले कार्यकर्ताले प्रतिवाद गरेर फर्जी मत हाल्न रोकेका छन् ।

एमालेसँग एक्लै प्रतिस्पर्धा गर्न नसक्ने र हार्ने निश्चित भएपछि मंगलसैन नगरपालिकामा एउटै प्यानल बनाएर लडेका कांग्रेस–माओवादीले निर्वाचन टोेलीलाई प्रयोग गरेर धाँधली गर्न खोजेका छन् । अध्यक्षमा कांग्रेस र उपाध्यक्षमा माओवादीको प्यानल बनाएर लडेका उनीहरुले मतदान प्रतिनिधि चाहिँ दुबै पदमा चुनाव लडेको एमालेको जत्तिकै माग गर्दै उनीहरुलाई आठ र एमालेलाई चार प्रतिनिधि तोकिएकोमा एमालेले कडा विरोध जनाएर त्यसलाई असफल पारेको छ ।

अछाममै रहनुभएका एमाले उपाध्यक्ष तथा सात नम्बर प्रदेश इन्चार्ज भीम रावलले सुदुरपश्चिमका सवै मतदान स्थलमा सत्ताधारीले आतंक मच्चाएको बताउनु भयो । ‘प्रहरी–प्रशासन र निर्वाचन टोलीलाई चरम दुरुपयोग गरिएको छ, हाम्राविरुद्ध कांग्रेस–माओवादी मिल्दा पनि जित्न नसक्ने भएपछि अनेक षड्यन्त्र गरिएको छ । तर, ती सबैलाई चिरेर हामी जित्छौँ,’ रावलले भन्नुभयो ।