अब यसरी हुनेछ प्रहरीले ढाँटेको छिनभरमै पहिचान

दाङ,  माघ २१ । अब प्रहरीले घरमा बसेर सञ्चार सेट मार्फट ड्युटीमा छु भनेर ढाँटे सिधै कारबाही हुने भएको छ । प्रहरीले भित्राएको नयाँ प्रविधिले प्रहरीको अवस्था सहजै पत्ता लगाउन सक्ने भएपछि झूट बोल्ने प्रहरी कारबाहीमा पर्ने भएका हुन् ।

प्रहरीले भित्राएको डिजिटल रेडियो कम्युनिकेसन सिस्टमले प्रहरीको अवस्था सहजै पत्ता लगाउन सक्ने छ । प्रहरीलाई प्रविधिमैत्री बनाउन जिपीएस सिस्टमबाट प्रहरीको अवस्था पत्ता लगाउन थालिएको हो।

यो प्रविधि अहिले दाङको जिल्ला प्रहरी कार्यालयमा राखिएको छ। यसअघि पोखरामा यस्तो प्रविधि जडान गरिएको थियो। प्रहरीले दिने सेवालाई चुस्त बनाउन प्रविधिको प्रयोग बढाइएको हो।

डिजिटल रेडियो कम्युनिकेसन सिस्टम सहितको कमाण्ड सेन्टर स्थापना गरिएको र सोही सिस्टमबाट प्रहरीको अवस्था सजिलै पत्ता लगाउन सकिने छ। अब दाङका कुनै पनि स्थानमा सञ्चार सेट बोकेर डिउटीमा रहने प्रहरीले बोल्ने कुरा सञ्चार सेटको संकेतबाटै को कहाँ छ भन्ने जानकारी जिल्लामा प्राप्त हुने छ। साथै सञ्चार सेट बन्द गरेर बस्न समेत पाउने छैनन्।

प्रहरी डिउटी स्थानमा भएको या नभएको बारेमा जिल्लाबाटै थाहा पाउन सकिने छ । यसले प्रहरीको कामकारबाहीलाई प्रभावकारी बनाउनका साथै अल्छि प्रहरीलाई कारबाही गर्न सहज हुने भएको छ ।