इराकी हिंसामा १० जना मारिए

बग्दाद, २३, चैत ।   इराकको किर्कुक र दियाला प्रान्तमा बिहीबार साँझ भएका दुई वटा आकस्मिक हिंसात्मक घटनामा परी १० जनाको मृत्यु भएको छ ।

यी मारिएकामा हसद साबीका छजना लडाकूको शव भेटिएको सुरक्षा अधिकारीहरुले पुष्टि गरेका छन् । उनीहरुलाई बन्दुकधारीहरुले केही दिन अघिमात्र अपहरण गरेका थिए ।

मारिएकामा ती अपहरणमा परेका व्यक्तिका साथै अरु पनि सर्वसाधारण भएको अनुमान गरिएको छ । प्रहरीले मारिनेमा सर्वसाधारण नागरिक परेका बताएको छ ।

त्यसैगरी इराकको पूर्वी प्रान्त दियालामा इस्लामिक स्टेट (आइएस) लडाकूहरुले हिम्रिन क्षेत्रमा सडकमा गुडिरहेको एक सर्वसाधारणको कारमा गोली प्रहार गरेका थिए ।

आक्रमणमा परेको कारमा सवार चारजनाको मृत्यु भएको छ । मृतकमध्ये एक महिला र अर्का एकजना बालक रहेको बताइएको छ । त्यसमा परी अरु दुईजना घाइते भएका छन् ।

त्यो कारमा उनीहरुले किन हमला गरेका थिए भन्ने बारेमा भने केही बताइएको छैन । उक्त कारमा एकै परिवारका व्यक्ति रहेको सो समाचारमा जनाइएको छ ।