आज छठको अन्तिम दिन उदाउँदो सूर्यलाई अर्घ दिइदै

आज छठ पर्वको अन्तिम दिन, ताल, तलाउ र नदी किनारमा भक्तजन उपस्थित भई उदाउँदो सूर्यलाई अर्घ दिदै छठ मनाइदैछ । राजधानी काठमाडौँ लगायतका देशका विशेषगरी तराई मधेस क्षेत्रमा अहिले विहानैदेखि ठूलो संख्यामा भक्तजन उपस्थित भई उदाउँदो सूर्यलाई अर्घ तथा पूजाआजा गरिरहेका छन् । कात्तिक शुक्ल चतुर्थीदेखि सप्तमीसम्म मनाइने छठ पर्वमा व्रत गरे दुःख र दरिद्रताबाट मुक्ति पाइन्छ भन्ने जनविश्वास छ। यसमा झुप्पा–झुप्पा फलहरू चढाउँदा सूर्य देवता प्रशन्न भई बर्तालुका कुटुम्बसहित सबै सन्तानको भलो हुन्छ भन्ने मान्यता पाइन्छ।

ऐतिहासिक पौराणिक ग्रन्थ महाभारतमा उल्लेख भएअनुसार द्रोपदीसहित पाँच पाण्डव अज्ञातवासमा रहँदा उक्त गुप्तवास सफल होस् भनी सूर्यदेवलाई आराधना गरिएको थियो। त्यस समयमा पाण्डवहरू विराट राजाको दरबारमा बास बसेको उल्लेख छ। लोककथन बमोजिम सोही समयदेखि छठ मनाउने परम्पराको थालनी भएको हो।