एसिया प्यासेफिक सम्मेलनको विरोध गर्दै प्रदर्शन, ३० जनाभन्दा बढी पक्राउ

काठमाडौं, मंसिर १५ । काठमाडौंमा आजदेखि शुरु भएको एसिया प्यासेफिक सम्मेलनको विरोधको प्रदर्शनमा उत्रने ३० जनाभन्दा बढीलाई प्रहरीले पक्राउ गरेको छ ।

सम्मेलनस्थल बौद्ध चुच्चेपाटी नजिकै प्रदर्शनको तयारी गरिरहेकालाई प्रहरीले बल प्रयोग गरेर नियन्त्रणमा लिएको हो । हिन्दुधर्मसँग सवन्धित संघसंस्थाको आयोजनामा प्रदर्शनको तयारी भैरहदा प्रहरीले बल प्रयोग गरेको हो ।

प्रदर्शनमा सहभागीहरुले गैर सरकारी संस्थाले धर्म प्रचारका लागि गरेको सम्मेलनमा सरकार नै सहभागी भएको भन्दै विरोध जनाएका थिए । उनीहरुले प्रधानमन्त्री केपी ओली बिरुद्ध चर्को आलोचना गरेका थिए । सम्मेलनस्थल नजिकैको सडकमा चार–पाँच जना जम्मा हुने वितिक्कै प्रहरीले नियन्त्रणमा लिएको थियो ।

प्रदर्शनमा सहभागी हुनेमा राष्ट्रिय प्रजातन्त्र पार्टी र हिन्दुधर्मसँग सवन्धित संघसंस्थाका नेता कार्यकर्ता सहभागी थिए । एसिया प्यासेफिक सम्मेलनको नाममा सुरक्षा लगायतको कारण देखाउदै सरकारले जनतालाई अनावश्यक दुस्ख दिएको भन्दै केही दिनदेखि त्यसको विरोधमा काठमाडौंमा प्रदर्शन हुँदै आएको छ ।