कालीमाटी तरकारी बजारमा विचौलियाको दादागिरी : अनुगमन टोलीलाई चार घण्टा थुने , तनाव बढेपछि आपुर्ती मन्त्री कालीमाटी पुगे

काठमाडौं । कालीमाटी तरकारी बजार अनुगमन गर्न पुगेका वाणिज्य, आपूर्ति तथा उपभोत्ता संरक्षण विभागको टोलीलाई तरकारी बजारका विचौलियाहरुले ४ घण्टा थुनेका छन् । विहान ३ बजे अनुगमन टोली तरकारीको अनुगमन गर्न कालीमाटी तरकारी बजार पुगेका थिए । टोलीमा रहेका उपभोक्ता अधिकारकर्मी सहितलाई आफुलाई व्यापारी भन्ने विचौलियाहरुले थुनेका थिए ।

उपभोक्ता अनुसन्धान मञ्चका अध्यक्ष माधव तिमिल्सिनाका अनुसार अनुगमनमा रौतहटबाट काठमाडौ ल्याइएको फर्सीको ट्रकमा कुनै विल विजक जारी गरेको बिल नभेटे पछि दुईवटा ट्रकलाई नियनत्रणमा लिएका थिए । त्यस पछि अनुगमन टोलीलाई ब्यापारी तथा बिचौलियाहरुले अवरोध गरेका थिए । अनुगमनको बिरोधमा घेरा हालिएपछि सरकारी अनुगमन टोली नै लामो समय कालिमाटी बजारभित्रै थुनिएको थियो ।

उद्योग, वाणिज्य, आपूर्ति तथा उपभोत्ता संरक्षण विभागको अनुगमन टोलीलाई बिचौलियाको समूहले आतंकित पार्न खाजेको थियो । आतंकित पार्न खोजिए पछि अनुगमन टोलीले मिडिया गुहारेका थिए । त्यस पटि आफूहरु घेराबन्दीमा परेको र असुरक्षा भएको भन्दै टोलीले आपूर्ति मन्त्री र प्रहरीलाई खबर गरेका थियो । प्रहरीलाई खवर गरेको घण्टौ पछि प्रहरी कालीमाटी तरकारी बजार पुगेका थिए । कालीमाटी वृत्तको प्रहरी टोलीले अनुगमन टोलीलाई व्यापारीको घेराबाट सुरक्षित रुपमा कालीमाटी बृत्त पु¥याएका थिए ।

बिहान ३ बजे नै आनुगमनमा पुगेको टोलीले टोलीले बिलबिजक नभएका २ वटा ट्रक नियन्त्रणमा लिएको थियो । तरकारी उत्पादन हुने क्षेत्रमा अनुगमन गरेर फर्किएको टोलीले काठमाडौं आइपुग्दा त्यसको मूल्य तेब्बरभन्दा बढी भएको निश्कर्ष निकाले पछि अनुगमनको योजना बनाएको थियो ।

तर, तरकारी लिएर आउने ब्यापारीसँग बिलबिजक माग्दा टोली नै लखेटिनुपरेको छ । सरकारी अधिकारीले तरकारीमा बिचौलिया नियन्त्रणका लागि अनुगमन गर्दा असुरक्षा बेहोर्नुपरेको भन्दै जिल्ला प्रशासन कार्यालयको ध्यानाकर्षण गराएका छन् । अहिले बजार अनुगमनमा अवरोध गर्ने मुख्य नाईकै भरत खतिवडालाई गिरफ्तार गरिएको छ । संधै तरकारी किन बेचमा व्यस्त रहने कालीमाटी तरकारी बजार सोमवार तनाव ग्रस्त देखियो ।

संयौको संख्यामा प्रहरी तैनाथ गरिएको थियो भने काठमाडौ प्रहरी परिसरका प्रमुख बसन्त लामा समेत कालीमाटी पुग्नु परेको थियो ।

कालीमाटी बजारमा तनाव बढेपछि आपूर्ति मन्त्री मात्रिका यादव आफैं कालीमाटी तरकारी तथा फलफूल बजारमा पुगे । मन्त्रीसँग वाणिज्य तथा आपूर्ति सचिव चन्द्रकुमार घिमिरे पनि बजार अनुगमनमा भएको अवरोधबारे जानकारी लिन पुगेका थिए ।

तनावको स्थिति उत्पन्न भएपछि कालिमाटी बजार विकास समितिको भवनमा अनुगमन टोली थुनिएको थियो ।अनुगमन टोलीलाई सुरक्षित भएको पाए पछि आपूर्ति मन्त्री मात्रिका यादव कालीमाटी बाट फर्किएका थिए ।

अहिले पनि ब्यापारीहरुले बजारको गेट बन्द गरेर अनुगमनको बिरोध गरिरहेका छन् ।