गगन थापाले गरे चुनाव खर्चको विवरण सार्वजनिक,देखियो हिसाबकिताब गोलमाल

काठमाडौं । कांग्रेस महामन्त्री तथा प्रतिनिधिसभा सांसाद गगन थापाले आज बिहीबार गएको मंसिरमा भएको आम चुनावको खर्च विवरण सामाजिक सञ्जालमार्फत सार्वजनिक गरेका छन् ।

थापाले निर्वाचन आयोगमा आफूले चुनावमा गरेको खर्चको विवरण पेस गरेको प्रमाण सामाजिक सञ्जाल फेसबुकबाट सार्वजनिक गरेका हुन् ।

आयोगमा गत मंसिर २५ गते नै उनले चुनावी खर्च विवरण बुझाईसकेका थिए तर सार्वजनिक नगरेकाले आयोगले उनीबाट जरिवाना असुल गरेको थियो । उनले आयोगलाई बिहीबार १५ हजार जरिवाना तिरेपछि खर्च विवरण सामाजिक सञ्जालबाट आज सार्वजनिक गरेका हुन् ।

उनले सार्वजनिक गरेको खर्चको विवरण अंक र अक्षरमा भने भिन्नता देखिएको छ । उनले विभिन्न १० शिर्षकमा खर्च गरेका छन् । अंकमा उनले २३ लाख ४२ हजार ७ सय ६८ रुपैयाँ १० पैसा खर्च गरेको उल्लेख गरेका छन् । तर, अक्षरमा भने उनले तेइस लाख अड्चालिस हजार सात सय रुपैयाँ दश पैसा खर्च उल्लेख गरेका छन् । यसरी उनले अंक र अक्षरमा उल्लेख गरेको रकमको बीचमा ६ हजारभन्दा धेरै रकमको भिन्नता छ ।

आयोगले उनको निर्वाचन क्षेत्र काठमाडौं ४ मा उम्मेदवारले २७ लाख रुपैयाँसम्म खर्च गर्न पाउने अधिकतम सीमा तोकेको थियो । थापाले सबैभन्दा धेरै छापाखाना खर्च शिर्षकमा १० लाख ७ हजार ७ सय १० पैसा खर्च भएको उल्लेख गरेका छन् ।