गणतन्त्रपछि नेपालमा यसरी मौलाउँदैछ धर्म परिवर्तन

पुष १६, काठमाण्डौ । नेपाल धर्मनिरपेक्ष राष्ट्र कायम भएसँगै नेपालमा क्रिश्चियन धर्म तीव्र रुपमा फैलिएको छ । दुर्गम ठाउँहरुमा बसोबास गर्ने नागरिकलाई आर्थिक प्रलोभन देखाएर धर्म परिवर्तन गराउने गरिएको छ । नेपालको पछिल्लो समय आफ्नो धार्मिक आस्था परिवर्तन गरी क्रिस्चियन र मुस्लीम धर्ममा प्रवेश गर्ने मानिसको संख्यामा बृद्धि आएको छ ।

धर्म परिवर्तनलाई कानूनले बन्देज लगाएता पनि विगत दुई दशकयता नेपालमा क्रिश्चियानिटी तीव्ररुपमा फैलिएको छ । गहिरोसँग जरा गाडेको छुवाछुत प्रथाबाट उन्मुक्तिको माध्यमका रुपमा पनि यसलाई धेरैले लिएका छन् । दुई शताब्दीभन्दा बढी समयदेखि हिन्दू राजतन्त्रले शासन गरेको देशमा सन् २००८ मा गणतन्त्र आयो । गणतन्त्रसँगै हिन्दुराष्ट्र खारेज गरेर धर्म निरपेक्ष बनाइएपछि धर्म परिवर्तन सहज बन्दै गएको हो ।

सन् २०११ मा गरिएको जनगणना अनुसार नेपालको २ करोड ९० लाख जनसंख्यामा क्रिस्चियनको अनुपात १.५ प्रतिशत मात्रै छ । तर, क्रिस्चियन समूहहरुले आफ्नो समुदायको जनसंख्या ३० लाखभन्दा माथि पुगेको अनुमान गरेका छन् । तर आफूहरुले जबरजस्ती धर्म परिवर्तन नगराएको नेपाल ख्रीष्टियन महासंघका अध्यक्ष सिबी गहतराज दाबी गर्छन् ।

यता नेपाल प्रहरीले भने क्रिस्चियनहरुले गाउँगाउँमा गएर गरीब मानिसहरुलाई आर्थिक लोभ देखाएर धर्म परिर्वतन गराउने गरेको दावी गरेको छ । जवरजस्ती धर्म परिर्वतन गराएको भन्दै उजुरी आउने गरेको प्रहरीको दावी छ ।

अशिक्षा, गरीवीका कारणले विभिन्न प्रलोभनमा पारेर धर्म परिर्वन गराउने गरेको नेपाल प्रहरीका प्रवक्ता उत्तमराज सुवेदी बताउँछन् ।

जवरजस्ती धर्म परिर्वतनका कार्यमा संलग्नलाई कानुनमा उल्लेख भए अनुसार ५ बर्ष कैद र ५० हजार सम्म जरिवाना गर्ने नियम छ ।

धर्मान्तरण नेपालमा लामो समयदेखि अवैध कुरा हो । तर, यसै वर्षदेखि कार्यान्वयनमा आएको नयाँ आपराधिक संहिताले यस्तो कार्यमा संलग्नलाई तीन वर्षदेखि पाँच वर्षसम्मका लागि जेल पठाउने व्यवस्था गरेको छ । यस्तो अपराधमा सजायँ पाएका विदेशीहरुलाई आफ्नो सजायँ भुक्तान गरिएपछि देशनिकाला गरिनेछ । तर यो नियम प्रभावकारी रुपमा कार्यान्वयन भएको छैन ।