ठाउँमात्र ओगटेर बस्ने प्रथाको अन्त्यका लागि मेरो उम्मेद्वारी : तामाङ

महासचिवको उम्मेदवार बन्नुभएको छ किन ?
यस क्षेत्रको विकृती, विसंगतीहरुलाई अन्त गर्दै निर्माण व्यवसायीहरुको हकहितमा काम गर्नका लागि मैले महासचिव पदमा उम्मेदवारी दिएको हँु । साना निर्माण व्यवसायीहरु माथि बर्षौ देखिको थिचोमिचो छ । त्यस्तै राज्य र हामी व्यवसायीहरु बीच पनि ठु्लो खाडल छ । मालिक र नोकरको बीचमा हेर्ने प्रचलन रहेको छ । त्यसलाई हटाई सुमधुर सम्बन्ध विकास गर्न आवश्यक छ । त्यसको अन्तका लागि काम गर्ने हेतुले मैले उम्मेदवारी दिएको हुँ ।

तपाईले देखेको यस क्षेत्रको समस्या के के हुन् ?

समस्या त धेरै छन् । भूक्तानी प्रणालीमा समस्या छ । जुन अनुसार सम्झौता भएको हुन्छ । त्यो अनुसारको भूक्तानी हुदैन । राज्यले हामीलाई निकै अपहेलना गरेको छ । हामी राज्यको पाँचौ अंग हौ । तर पनि हामीलाई अझै सम्म मुलुकको विकास निर्माणको साझेदारको रुपमा लिन सकेको छैन । सधै ठेकेदारको रुपमा मात्र हेर्ने गरेको छ । समय अनुसार यस क्षेत्रमा पनि धेरै परिवर्तन भएको छ सोही अनुसार जनशक्ति उत्पादनका लागि तालिम लगायतका कामहरु गर्नुपर्ने अवस्था छ । त्यस्तै प्राविधिकको पनि प्रमुख समस्या रहेको छ । हामी साना व्यवसयाीहरुले प्राविधिक राखेर काम गर्न सक्ने अवस्था छैन । सरकारी प्राविधिहरुले हामीले शतप्रतिशत काम गरेपनि ७० प्रतिशत मात्र काम भएपछि लखेट्ने गरेको प्रवृती व्याप्त छ । जसको निराकरणका लागि यस अघिको नेतृत्वले खासै प्रयास गरेको छैन ।

तपाई विजयी हुने आधार के हो ?

मैले विगत १०–१२ दिन देखिको चुनाव प्रचार–प्रसारका क्रममा धेरै व्यवसायीहरुसँग भेट गरे । उनीहरुले मलाई सकारात्मक प्रतिक्रिया दिनु भएको छ । संस्थामा धेरै लामो समय देखि एउटै व्यक्तिले हालीमुहाली गरिरहेको छ । त्यसकारण नयाँ व्यक्तिको खोजीमा छौ । तपाईले आट गर्नुभएको छ भनेर प्रोत्साहन गर्नुभएको छ । सानो व्यवसायीहरुलाई पनि माथि उठाउन उनीहरुको हकहितका लागि लड्न भनेर मैले महासचिव पदमा उम्मेदवारी दिएको हो । त्यसकारण म विश्वस्त छु मलाई साथीहरुले विश्वास गर्नु हुने छ ।

उसो भए अव सहमतिय नेतृत्व चयनको अवस्था सकिएको हो ?
सर्वसम्मत नेतृत्व चयनका लागि हामीले प्रयास नगरेका होइनौ । धेरै प्रयासहरु गर्यौ तर ती प्रयासहरु सफल हुन नसकेपछि हामी निर्वाचनमा होमिएका हौ । मैले अघि पनि भने हामी हाम्रा प्रतिस्प्रधीहरुलाई भन्यौ तपाईहरुले विगतमा संस्थामा धेरै समय विताई सक्नु भयो । तर व्यवसायीको हकहितमा खासै काम गर्न सक्नु भएन । अव तपाईहरुले हामीलाई अवसर दिनुस् हामी केही गर्न चाहन्छौ भनेको हो तर उहाँहरुले संस्थामा बसेर समग्र निमार्ण व्यवसायीको हितमा काम गर्न सक्नुभएन । यहाँ टासी रहनु पर्ने के छ ?

त्यही भएर होला सायद उहाँहरुले सजिलै छाड्न चाहनु भएन । विगतमा पनि उहाँहरुले संस्थामा रहेर आफ्नो आर्थिक हैसियत बढाउने बाहेक अन्य खासै काम गर्न सक्नु भएन । त्यसकारण ठाउँमात्र ओगटेर बस्ने प्रथाको अन्तका लागि हामी निर्वाचनमा होमिन बाध्य भएका हौ । त्यसर्थ यो निर्वाचनले काम गर्ने व्यक्तिलाई संस्थामा पठाउने छ भन्नेमा म विश्वस्त छु ।