डा. गोविन्द केसीलाई प्रधानमन्त्री ओलीकाे अाग्रह: अनशन छोडेर काठमाडौं आउनुहाेस

यसैबीच, नेपाल चिकित्सक संघले प्रधानमन्त्रीको निजी सचिवालयले डा. केसीसँग वार्ताको वातावरण मिलाइदिन आग्रह गरेको बताएको छ। ‘फोनमै भए पनि डा. केसीसँग प्रधानमन्त्री ओलीले वार्ता गर्न चाहनु भएको छ भनेर प्रधानमन्त्रीको सचिवालयबाट कुरा आएको हो,’ चिकित्सक संघका अध्यक्ष मुक्तिराम श्रेष्ठले भने, ‘के कुरा हुन्छ हामीलाई थाहा छैन, डा. केसीसँग सम्पर्क हुने नम्बर उपलब्ध गराएका छौँ।’

तर अर्यालले भने यस्तो गम्भीर विषयलाई अहिल्यै सार्वजनिक गरेर चिकित्सक संघले सस्तो राजनीति गर्न खोजेको आरोप लगाए। ‘प्रधानमन्त्री ज्यूले डा. केसीसँग जसरी हुन्छ वार्ता गर्ने प्रयास गरिरहनु भएको छ। उहाँ समस्या समाधानका पक्षमा हुनुहुन्छ,’ अर्यालले भने, ‘त्यो फोनमा पनि हुन सक्छ, भेटेरै पनि हुन सक्छ। तर यस्ता कुरालाई अहिले प्रचारमा ल्याउनु ठीक होइन।’

चिकित्सक संघले आइतबार साँझ मात्र प्रधानमन्त्री ओलीलाई भेटेर डा.केसीको जीवन रक्षा गर्न माग गरेको थियो। संघले ७२ घन्टा सरकारलाई पर्खने र नभए आकस्मिक बाहेकका सेवा बन्द गरेर आन्दोलनमा उत्रने चेतावनी दिएको थियो।

डा. केसीको स्वास्थ्य अवस्था
चिकित्सा क्षेत्र सुधारको माग गर्दै डा. केसी जुम्लामा अनशन बसेको सोमबार १० दिन पुगेको छ। डा.केसीको उपचारमा संलग्न डा. अभिषेक सिंहकाअनुसार केसीलाई छातीको बीच भागमा दुखाई, कमजोरी थकान महसुस, मांसपेशी बाउँडिने, टाउको दुख्ने, रिंगटा लाग्नेजस्ता समस्या छ।

सेतो रक्तकोष घट्दो क्रममा रहेकाले संक्रमणबाट बचाउन उनलाई ‘स्पेशल केयर युनिट’ मा राखेर उपचार भइेहरको डा. सिंहले जानकारी दिए। अन्य औषधि लिन नमानेकाले उपचारमा कठिनाइ भइरहेको उनले बताए।