डिपिएलको उपाधि अत्तरियालाई

काठमाडौं ११,फागुन।भारतीय खेलाडी सन्नी पटेलले सानदार ब्याटिङ गरेपछि तेस्रो संस्करणको धनगढी प्रिमियर लिग (डिपिएल) को उपाधि सिवाईसी अत्तरियाले जितेको छ । शनिबार भएको फाइनल खेलमा अत्तरियाले महेन्द्रनगर युनाइटेडलाई ३ विकेटले पराजित गर्दै उपाधि उचालेको हो ।

अत्तरियाले उपाधिसँगै ३० लाख हात पारेको छ भने उप विजेता टोली महेन्द्रनगरले १२ लाखमा चित्त बुझाएको छ।

फाप्ला क्रिकेट मैदानमा टस जितेर पहिला ब्याटिङ थालेको महेन्द्रनगरले २० ओभरमा अल आउट हुँदै १ सय २३ रन बनाएको थियो । महेन्द्रनगरका लागि ओपनर दिलिप नाथले ४१ बलमा ५ चौका र १ छक्का प्रहार गर्दै सर्वाधिक ४३ रन बनाए ।

महेन्द्रनगरले दिएको १२३ रनको लक्ष्य अत्तरियाले मात्र एक बल बाँकी छँदा ७ विकेट गुमाएर भेट्टयो ।
एक समय ५४ रन जोड्दा ५ विकेट गुमाएको अत्तरियाको पारी सन्नी पट्टेलले कप्तान दीपेन्द्र सिंह ऐरीसँग मिलेर सम्हाले । दुबैले छैटौं विकेटका लागि ३८ रनको साझेदारी गरे । ऐरी व्यक्तिगत १७ रनमा आउट भए ।

तर, पट्टेलले आक्रामक पारी खेल्दै अत्तरियालाई उपाधि दिलाएका छन् । २६ बल सामना गरेका उनले तीन चौको र तीन छक्काको मदतमा नटआउट ४७ रन बनाए । उनी प्लेयर अफ दि म्याच र प्लेयर अफ दि सिरिज दुबै बनेका छन् ।