तयार भयो राष्ट्रिय परिचयपत्र

काठमाडौं, पुस १९ ।  सरकारले आगामी आइतबारदेखि नागरिक परिचय पत्र वितरण गर्ने भएको छ ।

सरकारले बनाएको राष्ट्रिय परिचयपत्र व्यवस्थापन केन्द्रले पहिलो चरणमा पाँचथर जिल्लाका १ लाख १० हजार र सिंहदरबारमा कार्यरत ७ हजार निजामती कर्मचारीलाई परिचय पत्र वितरण गर्ने तयारी गरेको छ ।

केन्द्रका प्रमुख कार्यकारी निर्देशक रामकृष्ण सुवेदीका अनुसार पाँचथर र सिंहदरबारका कार्मचारीका लागि परिचय पत्र वितरणको सम्पूर्ण तयारी पूरा भएको छ ।

गत पुष १३ गते बसेको मन्त्रिपरिषद् बैठकले परिचय पत्र सेक्यिुरिटी फिचरको झन्झट साम्य भएपछि परिचय पत्र वितरणका लागि बाटो खुलेको हो ।

परिचय पत्रमा जैविक र वैयक्तिक विवरणका साथै सर्वसाधारणले नदेखिने गरी सेक्युरिटी चिह्न र फिचर राखिने भएको छ । राष्ट्रिय परिचय पत्रमा, जिल्ला प्रशासन कार्यालयबाट जारी भएको नागरिकताको सबै जानकारी, बुवा र बाजेको नाम समेत उल्लेख हुनेछ ।

आगामी दिनमा जन्मदर्ता नम्बरलाई, नागरिक परिचय पत्रमा राखिने व्यवस्था सहित लाईसेन्स, बैंकका एटीएमलाई पनि सोही परिचय पत्रबाट प्रयोग गरिने तयारी गरिएको छ ।