धानको उत्पादनमा ९ प्रतिशतले बृद्धि

काठमाडों, ९ पुस । नेपालमा यो वर्ष धानको उत्पादनमा झण्डै ९ प्रतिशतले वृद्धि भएको छ । कृषि तथा पशुपंक्षी विकास मन्त्रालयका अनुसार यो बर्ष ५५ लाख ८३ हजार मेट्रिक टन धान उत्पादन भएको हो । तर माग भ्रन्दा अझै झण्डै ४ लाख मेट्रिक टन कम रहेको छ ।

जनसंख्या बृद्धिदरलाई समेत जोडेर हेर्दा नेपालमा बर्षेनी ५९ लाख मेट्रिक टन धान आवश्यक पर्ने मन्त्रालयका भनाई छ । खाद्यान्नमा आत्मनिर्भर हुने सरकारी लक्ष्य यसपटक पनि पूरा नहुने भएको छ । मन्त्रालयको तथ्याङ अनुसार मौसममा आएको अनुकुलताले यसपटक धानको उत्पादकत्व झण्डै ७ प्रतिशतले बृद्धि भएको छ ।

उत्पादकत्वमा आएको वृद्धि सिचाईको उपलब्धता, मलखादको सहज आपुर्ति तथा मौसमको साथले यसवर्ष धानको उत्पादन वृद्धि भएको मन्त्रालयका सुचना अधिकारी बिनोद भट्टराईले जानकारी दिए । मन्त्रालयका अनुसार यो बर्ष धानखेती हुने क्षेत्रफलमा पनि १ दशमलव ३ प्रतिशतले बढेकाले राष्ट्रिय उत्पादनमा पनि वृद्धि भएको हो ।